ناح الحمام وقلت ياورق لا تنوح
خـــــل النياحه للبشرتقـترفها
غرد وفل الريش منته بمطروح
شوف الخضيرا يازرق الريش شفها
اللي عن علوم الوفا قاصر شبوح
تعيس حظ وعلته مكتشفها
واتل قلبي تلة تجذب الـــــــروح
تلة عسيف راعي البل عسفها
سمحة قوام من النظا زولها شوح
وبان الزبد فشدوقها من صلفها
من هاجس بين الحنايا كما الفوح
لونه على صم الحديده عكفها
كبدي بها عن لذة الزاد ماسوح
وعيني يحاربها الكرى ويخطفها
اشوفها فالعين تبرق لها ضوح
واصد عنها ماتقال اعرفها
وكم واحدٍ مثلي من الهم مجروح
له غايةٍ عيا يحقق هدفها
دايم وهو والفقر طارح ومطروح
واعز ماعنده حياته عزفها
دنيا تهد صروح وتشيد صروح
وتخلي اللي ما يعرفها يعرفها
يدله بها خبلٍ من الرز دحدوح
يداير اللقمه وثم يخطفها
لو تنصحه ما يقبل النصح سلتوح
ا ميل الغتره و يمضغ طرفها
يالله يامنزل كتابك على اللوح
ياخالقاً دنيا بعيدٍ طرفها
يامغرقاً فرعون يامنجياً نوح
تشفق بحال اللي دموعه ذرفها
تجعل لنا في تالي العمرمصلوح
والخاتمه تقضي وهي في شرفها