دعواتكم لوالدي بالرحمة
قصيدة تكشف لكم عن مضمونها
ألا يالله عفوك يامنزل سورة الأنفال
ألايامن تعلا في سماه وزين نجومه
ألا يالله حنا دون ظلك مابغينا ظلال
تيسر درب من نفسه لها عامين مكتومه
يشح الوقت بالكف الشحيحه وأكرم الفنجال
من دلال الكرم والطيب لازاد الردي لومه
ربيت أبيت عز ولا ربيت بمنزل الجهال
وحفظت من المراجل والوصايا كل معلومه
مع خوالن إذا عدل الزمن خيب ظنوني ومال
يسدون اللزوم ويكرمونه فوق ملزومه
بحزة ساعتن تثقل على كتف اليتيم أحمال
وتصير أحلام عمره من جحيم الضيم موهومه
يذوقه العناء طعم المرار ولا يذوق زلال
ويناديه التعب والليل كله ماعرف نومه
مداه إبعيد وأعياه الشقى بالحـل والترحال
وأثر كل أمنياته من سجل الحظ معدومه
نطر شجرة سنينه وأثمرت له ضحكت العذال
ولقى بعض العيون بحسدها المدفون مسمومه
وأنا عارف ولاني جاهلن في حكمة اللي قال
ترى مال أبـن أدم فـي حياته غـيـر مقسـومه
ولكن للوفاء شرهه .. ولدموع الشرف منزال
على خد الشريف اللي يحفظ الطيب بسلومه
وأثر بعض البشر ربعه وبعضه مايساوي ريال
ردي نفسه وعيبه مستتر في رزة أهدومه
وإذا جار الزمان وصار لي مع هالزمان أشكال
قليل اللي بحصل حاسب همي من همومه
تظاهر بعضهم بالمرجله وبطيبين الفال
وتغرك بالمجالس هرجته مع كثرة علومه
وإذا فتشت باللي ماضين له من قديـم أفعال
لقيت أطهر علومه في نفايا الذل مردومه
غريـبه ناس مافيها لذرات الحياء مثقال
غريبه ناس صورتها بوجه الحظ مرسومه
غريبه ناس تقلب حالها في كل يومن حال
نواياها بختم الكذب والتزييف مختومه
عـسى مانلتقي معاها لا في عمن ولا في خال
ولا نبغى لها بـيعه ولا نبغى لها سـومه
ولا نطمع بهالدنيا غناه ولا ندور مال
مدام إن النهايه في مصير الخلق محـسومه
ولانرجي سوى عطف الكريم الواحد المتعال
عظيمن جل شانه خالق الإنـسان في يومه
عساه يشوفنا بعين الرضا والهم عنا يزال
ونشم من الفرح بعد التعاسه ريح يشمومه
اتمنى تنال اعجابكم