ماهمني من باعنـي دون مقيـاس
عزيت نفسـي والامانـي بعيـده
انا كذا طبعي مع كـل الأجنـاس
القلـب عزيتـه وشديـت قـيـده
حوله من الاضلاع حطيت حراس
تحميه من غدر الليالـي الشديـده
اللي يذوق الغدر صافي من الكاس
لابـد يتعلـم وعلـمـه يفـيـده
ضويت لي في سود الايام نبـراس
يهدي حياتـي للـدروب الرشيـده
موحش فكري عن تفاكير الادناس
نفسي عن الهفوات دايـم زهيـده
واللي يحاول يسرق اللول والماس
ماطالته عينـه ولا طالـت أيـده
يبطي ويشهر للبشر ذل الافـلاس
لا بدد اموالـه بيفلـس رصيـده
ماكل صيد يجيبه الحـر قرنـاس
يموت بالرمضا ولا هـو يصيـده
واللي يحاول يكسر الراس بالفاس
مثل الـذي بيـده يكسـر حديـده
كتبتها جمله انـا بيـن الاقـواس
(لاتقرب النيران جسمـك تبيـده)