|
رد: [ ( شَوُآردْ شَع’ـريّه ) ] !
جاني واحد قال : بسأل كم سؤال
وقبل يسأل قلت : أنا ماني خبير !
قال: جاوبي بس , يابنت الحلال
وكل كلمه حِطَّيهَا .. فبيتٍ صغير
قال نبدي : وشو تعريف......
القهر : إن شفت دمعات الرجال
والوطن : (إنسان) .. مِتغيِّر كثير
والطفل : لعبه على شاطي الرمال
والأمل : إحساس في عين الضرير
الوفا : [قلبين] .. يجمَعهُم حلال
والرَجُل : اللي على أهله يغير
والرجا : لا قلت للواطي تعال
والفشل : مدري ولكنه مرير
الشعر : في وقتنا .. بدر وطلال
وكان أوَّل : حيل يعجبني جرير ..!
والغلا : إحساس إلى حَد[ الخيال]
والعِشِق : لا شفت مَعشُوقِك تطير
والجفا : إعكس مفاهيم / [الوصال ]
والوَصِل : يعني تأكَّد فيك خير
والعقل : تِسْفَه أقاويل الجهال
والجهل : إن قلت عن نفسك كبير
والخطر : لا صار ما عندك مجال
والبلا : إن صرت معدوم الضمير
والعجب : لا صرت تسأل منهو قال
والتعب : إن كنت تِبْحَثْ عن مصير
الغنى : بالنفس ما هو راس مال
والفقر : من كان .. بأعماله فقير
|