ملتقى طلاب وطالبات جامعة الملك فيصل,جامعة الدمام - عرض مشاركة واحدة - بخصـــــــــــــــــــوص الضمـــــــــــــان الإجتماعـــــي للقدامى فقط >>> الخبر أكيد مني شخصياً

|~ مهاوي الشمري ~| · #1 2011- 9- 28

السلام عليكم ورحمة الله وبركاته ...

مالي بالمقدمات ...

اممممم شسمه كثرت المواضيع بخصوص الضمان الاجتماعي ...

كيف نرسل ومتى نرسل ووشي الورقة المطلوبة علينا ووووو ومتى ينزلون اسمائنا ومن هالكلام اللي طال علينا من قبل رمضان وحنا ننتظر ..

المهم مالكم بالطويلة ...

طبعا أنا أتكلم عن الطلبة القدامى ,,, مالي شغل في الجدد لأني مااعرف نظامهم ...

بعد ماروقت بعد العشاء البارح ...

مسكت الجوال ودقيت على الشؤن الطلابية للتعليم عن بعد ..

تفاجأت بالرد مع انه مو من عادتهم يردون بهالسرعة ,,, بس الحمدلله

سألتهم عن الضمان للطلبة القدامى ...

قلت يادكتور هل اكتفي فقط بالحركة اللي انا سويتها عن طريق الخدمات الطلابية ؟؟

قالي نعم ,, بس انتي ارسلتي عن طريق الايقونة اللي في الخدمات الترم اللي راح قلت ايه قال خلاص انتم مو مثل الطلبة الجدد انتم قدمتوا وحنا رفعنا اسمائكم لحقين الضمان وننتظر ردهم ...

قلت يادكتور دفع الرسوم بدأ وقريب بينتهي ... هل ندفع رسومنا على كلامكم بأننا ندفع ولما تنزل أسمائكم نرجعها لكم ...؟؟

قالي يابنتي

’,,لاتدفعين ولا ريال ... قلت وإذا أنتهى دفع الرسوم ومانزلتوا أسامينا ,,, قال انتي واثقة من أنك من الضمان ومن المستفيدين لاتدفعين شي حتى لو أنتهى فترة السداد ...
أنتم من المستفيدين للمكرمة وهذي مكرمة من الملك لكم انتم يالطلبة .. ومافيه أحد يجبركم على الدفع

...

قلت طيب وألحين وش أسوي ؟؟

قالي ادرسي وأنتظري ليما تنزل أساميكم ونعطيكم خبر

... وبس ؟؟

الله يعطيه العافية ويكثر من أمثاله هالدكتور وليت فيه مثله بهالدنيا كثير ...

طبعاً أنا تعبت من كثر مااسأل وتعبت من القال والقيل وتعبت من كثرة المواضيع ...

وقلت مو معقولة بقعد كذا فتصلت والحمدلله تطمنت وارتحت على الآخر لما سمعت الكلام مباشر من الادارة نفسها ...

بس حبيت أخبركم اللي قلقان واللي مايدري وش يسوي هذا الخبر أكيد وأسألوا ابوي كان عندي وانا أكلمهم

... هع ...

<<<الله يستر لو يتغير كلام الجامعة ...

أسأل الله لي ولكم التوفيق في الدارين ...

تحياتي للجيمع ...