|
كالعادة : الاكاديمية الدولية تسرح طلابها
السلام عليكم ورحمة الله وبركاته
اخواني اعضاء وزوار المنتدى
اسعد الله اوقاتكم بكل خير
انا راح ابدأ بخبر الاغلاق حنا طلاب معهد الاكاديمية الدولية بحفر الباطن داومنا لمدة اسبوع لغة انجليزية
وفجأة وبدون سابق انذار اتفاجأ باتصال من الاكاديمية يقولون لي ان الدراسة الغيت عندنا
لا شعوريا قلت للمصري الي كلمني حنا نلعب والا شنو بالضبط انا مداوم عندكم وجايب كتب طلبتوها مني
وجايب مستلزمات ومتابع مع الاستاذ قالي بكل برود انا مالي شغل المهم انك تجي تسترجع فلوسك وتاخذ ملفاتك
والله يا اخوان لما رحت للاكاديمية شفت الطلاب الي هناك حالتهم تقطع القلب الي يصارخ ويقول انتم ضيعتوا مستقبلي انا ماسجلت بالجامعات بسببكم اني مقبول عندكم
والي يقول انا نقلت بيتي من الذيبية الى حفر الباطن بسبب هالمعهد واخرتها تسكرون وفي شباب باول عمرهم جايين كلهم طموح للدراسة والدوام بالمعهد ويتفاجؤون بالخبر الكارثة والله يا اخوان حتى المنكوبين في الدول الظالمة ما بين على اشكالهم مثل هالملامح المليئة بالحزن والكآبة والضياع
والمصيبة عذرهم يقولون انتم كلكم 19 طالب ماتكفون يعني بين قوسين حنا ما يشبعنا مليون او مليونين نبي أكثر
يا اخوان انتم مثل ما انتم عارفين ان المعهد يتبع لنفس المؤسسة الي فتحت كلية الغد واغلقوها والخبر الي ماتعرفونه انهم اغلقوا الاكاديمية الدولية الي بالزلفي وقالولهم تبون تدرسون الحقونا المجمعة او القصيم العام الماضي تقريبا
الى متى وهذه المؤسسة تلعب بالناس وتضيع مستقبلهم بلا حسيب او رقيب او حتى احد قدر يكلمها ويوقفها عند حدها
والمصيبة الاعظم سكوت كل من وزارة التعليم العالي و هيئة التخصصات الصحية على مثل هذا التصرف
صدق الي قال من امن العقوبة اساء الادب
والحين لو تحطون انفسكم يا طلاب المعهد القدامى بمكانهم وش راح تسوون
علما ان كل الجامعات ماراح تقبل خريجي السنة هذي في العام القادم لان اغلب الجامعات من شروطهم انهم يكونون من خريجي نفس السنة
يا اخوان حنا عايشين للاسف في غابة وليس دولة كما نعتقد القوي ياكل فيها الضعيف
اتمنى من الاعضاء والزوار ان يفيدوني بعدة اشياء
اولها وشلون نوصل الخبر الى الجرايد نبي نكشف هالمؤسسة التعليمية الفاشلة الي همها شلون تاكل فلوس الضعوف بدون مراعاة ظروفهم
والشي الثاني وش تنصحونا ندرس وهل في كلية او معهد او مدرسة او بقالة تدرسنا داخل حفر الباطن
من اول كان السعودي يمسك ملف اخضر ويدور وضايف
الحين صار ماسك ملف اخضر ويترجى المعاهد والكليات الاهلية انهم يدرسونه صار امله دراسة ومستقبل مظلم
وارفع راسك انت سعودي
|