السلام عليكم ورحمة الله وبركاته

يعطيك العافية " انيس النفوس " بميزان حسناتك ان شاء الله

منامي هو

اننا في مبنى غير بيتنا، تقريبا كنا بالدور الثاني من المبنى في صالة كبيرة ، مجتمعين العايلة من جهة ابوي كلنا ، وكان فيه مشادات بين والديني وعمي وزوجته .. كنت ما احب اسمع المناوشات اللي بينهم تضايقني واوقات ادافع عن اهلي وارد

لكن غالباً كنت احب اتخبى ورى ستار لنافذة زجاجية كبيرة واشوف الناس بالخارج ،، اذا طلّيت من النافذة اشوف سيارة اسعاف واقفه بجنب باب المبنى وسائق الاسعاف ولد عمي ( متوفى من 5 سنوات تقريباً.. الله يرحمه وهو ولد عمي اللي بينه وبين اهلي خلاف ) كنت اشوف بعيونه حزن وعدسة عينه متسعه اكثر من المعتاد وكأن عيونه بتدمع ..
وفيه ناس اشوفهم يحطون جثث بسيارة الاسعاف ،،

كان للستاره شرايط بلاستيكيه طويلة كنت العب فيها واطلعها من النافذه وانا واقفه جا عمي ( واحد ثاني ) يقول لي وش تسوين هنا ثم طل وشاف ولد عمي وقال فلان هنا ثم اخذ مني شريط ومزعه وصار يحاول ان ينزل الشريط حتى يلامس ولد عمي وبالفعل الشريط لامس كتف ولد عمي والتفت لفوق، بوقتها على طول عمي حط الشريط بإيدي كأني انا اللي سويت الفعل مو هو وراح عمي ثم نزل ولد عمي من الاسعاف ودخل المبنى ..

بوقتها كان وقت وجبه فالكل راح لغرفة الطعام بقيت انا بالصاله شفت ولد عمي جالس على احد الكراسي اللي كان يلعبون بها الصغار لابس ثوب ابيض وشكله مهموم .. جيته من وراها وضميته ، قال لي " تدرين انك اول وحده بتجين منهم ؟ " ثم قام والتفت علي وطلع لي ورقه صغيرة (كبر اوراق سند القبض تقريباً ) من جيبه اللي فوق وقال لي " خذي هذي ورقتك من الجنه " ومشى.

وهو طالع مر من جنب غرفة الطعام فإنتبهو له ، وانا لا شعوري رحت للغرفة وعيوني عليه وهو طالع من المبنى، كلهم يسألوني وش في الورقه وصارو يتهاوشون يبغون يعرفون وش مكتوب.. اخذ مني الورقه اخوي الصغير وكلهم اتجهو له عشان يعرفون وكنت اشوف بعيونهم الدهشه لما يقرأونها مع اني انا ما ادري وش مكتوب فيها ثم صحيت من النوم .