ياعزيز الجناب .. ويـا نزيـه الضميـر
المعـزّه مـا نخـلـف مـعـك قانونـهـا
شرهتك فوق صدري خلّهـا تستديـر
حـنّ كـف الملامـه وأكحـل عيونـهـا
مشّهـا لـو تسيرّهـا بسـلـك الحـريـر
الـوفـا مــن وراهــا والـغـلا دونـهـا
كيف ما تعلم أنّك مثل أخوي الكبير
والشـواهـد قـلـوب ٍ نـاصـع ٍ لـونـهـا
العتب من جنابك مـا يبـي لـه شويـر
مثـل قــول الأمـانـه عـنـد مامونـهـا
ما يهمّش مقامك وأنت قدرك قديـر
سيرتك بالوفاء تمشي على هونهـا
ضلع والضلع يبقى ضلع مهما يصير
لـو تـدفّـه كـبـار الــروس بقرونـهـا
الهبايـب تذعـذع .. والسوالـف تطـيـر
نعـرف النـاس صاحيهـا ومجنونهـا
بين شبـاب نـار .. وبيـن نفـاّخ كيـر
مدمـنـيـن النمـيـمـه مـــا يخـلـوّنـهـا
يردمـون النفـاق ويقطعـون المسـيـر
ويحـرفـون الحقيـقـه لـــو يعـدونـهـا
ناتج الشر شرّ .. وناتج الخيـر خيـر
كـل بـذره مـا تثمـر غيـر مضمونهـا
دايم الكذب بيـن الخلـق حبلـه قصيـر
وأنت تعرف طروق الناس ولحونهـا