العـَـجـَـايــَــز ْ عـِـنـْـدَمــا يــَـغـِـشـّــــون ْ 2 ..!!






لــلآسف ..

لا يزال غش العجايز مستمـرا ..!!



الوالده الله يحفظهـا و يخلّيها لنـا تداوم في مركز محو الأميـّه أيـام الأحد & الثلاثـاء & الخميـس ,

و دائما تطلع من المركز ع الساعه 7 , دوامهن يخلص 7 و ربع ..

بس المدرّسات يطلعونهن مبكر علشان يرتاحون من إزعاجهن و سوالفهن اللي ما تخلص ,

الصف اللي في أمـّي مثل ما قلت لكم مشاغبات و هذرتهن واجده ,


يوم أمس و لمـّا جت الساعه 7 تأخـّرت أمي ما إتصلت فينـا , مو عوايدهـا !!

إتصلت عليهـا و ردّت و كان عندها إزعاج .. قالت لي يمّك انا مشغوله في إمتحان مو فاضيه أكلّمك !!

إستغربت من كلامها .. اللي أعرفه إن الجو في الإمتحان يكون هدوووووء ,

و اللي يطلّع تلفونه يسحبونه هو وتلفونه برّا القاعه !!

و لكن عند العجايز كل شيء جايز .. غش و إزعاج و تلفون في الإمتحان ..


كنت واقف بـرّا المركز أنتظرها تخلـّص و لما جت سألتهـا : شنو هـ الإمتحان العجيب اللي كلّه إزعاج ؟!!

قالت لي إن المدرّسـه تضايقت من حركة العجايز اللي سووهـا ذاك اليوم لما حطّوا الطاولات جنب بعض ,

و يوم الثلاثاء كانت قايله لهم إنها راح تختبرهم يوم الخميـس في الحصّه الأخيره ,

و قبل لا يبدأ الإختبـار قامن العجايز و صفّن الطاولات جنب بعض مثل ذيك المرّه ,

جازت لهن الحركه ..

و لمـّا دخلت المدرّسـه إنصدمت بـاللي شافته و عرفت إن العجايز صعبه يعدلّن الطاولات ,

فــ قامت المدرّسه و أخذتهن حق فصل فاضي و قالت اللي تعدّل طاولتها و تغيّر مكانها راح أعطيها صفر !!

و بعد ما وزّعت عليهن الأوراق قالت لهن كلّ وحده تنتبه لـ ورقتها , و لا تطلـّعون صوت , بروح أصلي و أرجع ,

العجايز ما صدّقن على الله فضى لهن الجوّ بعد ما طلعت المدرّسـه ..

اللي ما درست للإختبار و تعرف تقـرأ فيهن طلّعت كتاب المادة و قامت تدوّر الإجابه ..

و الباقيات صاروا ينادون اللي فاتحات كتبهـن علشان يغشون منهن ,

و اللي تقول يا المصريه غششيني ,

و اللي تقول يهب يا وجهها يا كبر قلبها ما تبي تغشش ,

و اللي قامت تدعي على اللي ما تغششهـا ,

و اللي سحبت طاولتها و لصّقتها في طاولة وحده قاعده تجاوب ,


بعد ما رجعت المدرّسه و شافت الوضع عفسه و العجايز قالبين الفصل سوق جمعه !!

على كلام أمـّي إن المدرّسـه أجوديه و بنت حلال و ما ودّها تزّعل العجايز و تهاوشهـن ,

قالت لهن الإمتحان ملغي و راح أعيده لكم يوم الأحـد ,

إدرسوا و شدوا حيلكم .. لا تجي وحده مو دارسه لأن الإمتحان راح يكون صعب .

العجايز تضايقن من كلام المدرّسـه لأنهن غشن غش مو صاحي في الإمتحان اللي ما فيه أحد يراقبهن ..

[/ALIGN][/CELL][/TABLE1][/ALIGN]