تكبر وتنسى كل جرح وتجني=والجرح ماله غير الايام تشفيه
عيش بزمانك دالهٍ ومتهني=واللي كتبه الله على عبده يجيه
لا ماحيينا بالرجا والتمني=ولا طردنا من ورى الغير نرجيه
وقتٍ نعيشه غصب عنك وعني=نرضى ونقنع والقدر في مجاريه
يا اللي حروفك بالحزن عاتبني=بقول شئ وشئ انا مقدر احكيه
شوف الليالي بظلمها لوعني=عشت الكآبه والحزن في معانيه
مع كل هذا بس انا اضحك واغني=قلبي صبورٍ والاماني تسليه
ماهمني ظلم الزمن لو طعني=القلب دامي مابقى شئ يدميه
عايش زماني لو خذا الفرح مني=ربي يرده واهتني في موانيه
ونكبر وننسى كل جرح وتجني=والجرح ماله غير الايام تشفيه