مريت بابك وكن خطاي مجبوره
..... معاي شوق وعطر ريحة على ثيابي
في ظلمة الليل واثر القلب ديجوره
.....نارن عليها جلست برفقة اهدابي
يطول صمتي واحس النفس مكبوره
.....ومن لهفتي لك يبان الشوق باسبابي
فزيت ابجمع شتات حروف منثوره
.....لما لمحتك لحالك يغلى احبابي
شفقان واثر الفرح يهتم بحضوره
.....جيتك وكن السعد رحب وحيابي
كنيت ود وزفرت انفاس مذعوره
.....والمستحى خالطه بردن تدفابي
يسحر نضا الحور والزلات مغفوره
.....عذري سمين وخطاي الفادح اصوابي
واخذت لحظه معا برق لمع نوره
......سارح واسولف دخلت الحلم غيابي
قلت الوفا والعهد والامس والصوره
......قال الفراق وهوى من جوه شهابي
عرفت من حينها دنياي مغدوره
......مكتوب واللي يصير يصير لو مابي
ياتارك الدار فيني دار مهجوره
.....ماغير فيها معالم تحضن اصحابي
تعال واسمع معازف حزن مجروره
......مدام فيني تعب يصدح تغنا بي
تعال واجمع بقايا كسور بلوره
.....كانت هديتك وانا المهديك كل مابي
ودي تشوف الجفا بعيون ممطوره
.....دمع وسهر والاسف والصمت وغيابي
ياليت ارد الليالي والزمن دوره
.....وايام كانت لها ذكرى وتحيا بي
قفلت باب وكتاب تنزف سطوره
......وفتحت ياضيفة النسيان لك بابي