؛
(( حنا بدو )) !!
يلي على وجهي قريتـي كـل صفحـات الشقـى
اقري وأنا باكتب قصيدة واشعـل الساحـة حريـق
باقي كثر ما راح واللي راح نصـف اللـي بقـى
وان ماوصلت لغايتي باموت في نصـف الطريـق
يابنت يوم امطر غـلاك بقلـب ضيـدان وسقـى
تدرين وش سبة شقـاه وسبـة الجـرح العميـق ؟
شقاه من يمنـاه واسـم الشيـخ والنفـس امحقـى
والجرح منك ياأعذب العذبـات يالمـوت الرقيـق
يا بنت ما دام البـدو تخلـف هقـاوي مـن هقـى
وانا بدوي مني يشيل مـن الزمـن مـا لا يطيـق
ابفتخـر حنـا بـدو نعشـق علـى وضـح النقـا
حنـا بـدو فينـا الولـد للقمـة العليـا عشـيـق
حنا بدو فينـا الولـد لـو شـاف موتـه ماأتقـى
حنا بـدو فينـا الولـد يرقـا ولـو مالـه رفيـق
حنـا بـدو فينـا الولـد لا مـن رقـا رقـا رقـا
الين يوصل غايتـه لـو كـان فـي قمـة طويـق
يابنـت جيتـك والثمـن عمـري ابـي ليلـةٍ لقـا
يما كـذا والا بـلاش مـن الصداقـة والصديـق
وساعة تبسمتي وشفـت الجمـر والثلـج اصدقـا
قلت أشهد أن الموت حق وصحت لك صيحة غريق
واعتقت دمعي والزعل والحـزن لرضـاك أعتقـا
وأغفت عيوني فـي عيونـك ياعساهـا مـا تفيـق
وامنت باللـي سخـرك تقريـن صفحـات الشقـا
واشعلت بردي في دفاك وشبـت الساحـة حريـق
؛