{ يـا ضحكـــــــــة الـــــــورع }
ياضحكة الورع مدري وين شايفها
ان كان ماني متوهم! ضحكة فلانه !!
-
غمازته . شفته . تشبه شفايفها
وعيونه عيونها يضحك ونعسانه
-
والله ياضحكته عجزت اطوفها
اللي شغلني معه ؟ من جملت اخوانه
-
وقفت: والنفس مابدت حسايفها
ضيعت وقتي غصب؟ كله على شانه
-
ابنشده والبشر تتبع ولايفها !!
يلعب طرب بالملاهي بين ورعانه
-
صديت : والعين ماتنسى وصايفها
هذيك نفسي عليها حيل شفقانه
-
وانفسي اللي تحلفني واحلفها
حاولت اشكك ؟؟ وهي ماهي بغلطانه
-
تقول : هالورع والله من خلايفها
واقول ربي يخلق اشباه سبحانه
-
هذيك راحت وانا ماني بعايفها
حكم المقدر وكلن راح في شانه
-
خبري بها يوم جاها من طوايفها
اللي خذاها ويتبع سلم جدانه
-
ماشافته لا.. وهو ماهو بعارفها
ماشاورها ابد ماكنها انسانه
-
راحت وانابالشقى كني مناصفها
يامل قلب شكى همه وحرمانه
-
لليوم قلبي يردد لي سوالفها
هذيك نفسي عليها حيل شفقانه
مما راق لي /
حمد السعيد
التعديل الأخير تم بواسطة الــغـــدراء ; 2011- 11- 2 الساعة 11:27 PM
|