داش مدرعـم ..

<---- ما عنده وقت للتنسيق و التضبيط ..!!




السلام عليكم و رحمة الله و بركاته ,

مرحبـا فيكم جميعـا ,

عيدكم مبـــارك ,

و عسى العيد ينعـاد عليكم و على كل العزيزين و الغالين على قلوبكم و أنتم و هم بــ أفضل حال و أحسن صحّـه ,


الحمدلله .. قدرت أخلـّص من موضوع نتائـج مُسابقة " أفضـل مُدوّنـه " قبل العيـد ,

أبـارك لــلأخـت " sadeem_5 " على المركز الأوّل ,

و لــلأخــت " المها القحطاني " على المركز الثانـي ,

و لــلأخــت " A L K A D I " على المركز الثالـث ,

و أبارك أيضا لكل الأخوان و الأخوات اللي تضمّنتهـم قائمة " المُدوّنـات المرشّـحـه " ,

و كلهم بدون مبالغه كانوا يستاهلون الفوز , و لكن في كل مسابقه .. المتنافسون كُـثـُر و الفائـز واحد ..



اليوم أوّل أيـّـام عيد الأضحى ,

و بيني و بينكم أحسّ إن المتعه في هــ العيد تختلف عن متعة عيد الفطـر ,

يمكن لأن عيد الأضحى تكون له طقوس كثيره تقلـّل من الإستمتاع بــ أجواءه و لحظاته .. هكذا أرى الوضـع !!

بـالنسبة لي .. أجمـل ما فيه العيد هو ساعاته الأولـى , من صلاة العيد إلين صلاة الظهـر ,

و بعدها تختفي ملامح العيـد ,

يمكن لأن ما عندنـا صغـار في بيتنـا و يحنـّون علشان يروحون حديقة أو مدينة ملاهي !!

و يمكن لأنّنـا تعودّنـا نسهر في ليـلة العيد و نواصل إلين الظهـر , و مرّات قبل الظهر !!


المهـم ..




هاذي صورة ضحايانا ..

اللي تحت صبغوه و خلـّصوا , و اللي فوقه كانوا توهم راشينه و صابغينه ,

الضحايا شريتهم أمـس من " أبو جمـال العتيبي " و نعم الرجـل ,

كل ما بغيت لي خروف ما أعرف إلا أبو جمـال , صارلي سنين أتعامل معـاه ,

و قبل العيد أشتري الضحايا و أخلـّيهم عنده و أمرّهم صبح العيد و أخذهم ,

و علشان ما يضيـّعون و يخربطون بين خرفان النـاس ..

كل خروف يحطّون عليه علامه علشان يعرفه اللي شراه ,

جاء البنغالي يبي يحط لي رقم .. و قلت له حط هــلال لا تحط أرقـام ,

جاب قوطي الرش اللي فيه الصبغ و كان لونه أحمـر .. قلت له ما فيه صبغ أزرق ,

صدّق البنغالي و راح يدّور و جاني و معاه صبغ بنـي .. يقولي الأزرق خلـّص ..


ــــــــــــــــــــــــــــــــــــــــــــــــــ ــــــــ


أمـرين لا تستغني عنهـا المــرآه :

1 / الســوق .

2 / التسـوّق .

أشفـق على بنـات حـوّاء كثيرا عندمـا يقترب العيـد ,

بعضهن تنام و تنام و تصحى ليلة العيـد و تقول ما شريت شيء .. يا ويلي ويلاااه , يا قردي قرداااه ,

و قبل العيد يعملون زحمـه في السوق , و عسى ما تدخل لك مجمع و إلا سوق تلاقي قدّامك 10 حريم !!




بــصراحه ..

كنت أشفق على وضع بنات حـوّاء قبل العيـد لمـّا الوحده فيهن تلـّف السوق و تقول إنها ما لقت شيء يعجبهـا ,

مع إن 80 % من اللي في الأسـواق مخصّصه للحريم , و المحلات مو مقصّره في عرض آخر الموديلات ,

و لكن كل هذا طلـع و لا شيء عند إختيـار ملابس الأطفـال !!!

يمكن البعض يقول عادي الطفل أمره بسيط , أي شيء يمشي معاه و ملابسهم متوفـّره في كل مكان !!

هــ الكلام كنت أقوله قبل , و لكن لمـّا جرّبت الواقع حسـّـيت بــ الكلام اللي كنت أسمعه ,

و الغريب إن التمييـز وصل حتـّى إلى ملابس الأطفـال ,

يعني ملابس البنات الصغـار أحلى من ملابس الصبيّـان الصغـار !!

ليش ؟ و لمـاذا ؟!! الله أعلــم ,

في مركز تسـوّق عندنا و أعتقد إنه منتشر في بعض دول الخليج إسمـه " سنتـر بوينـت " ,

كل ما أروح لهـم و أبي أشتري شيء حق ولدي أنصدم بــ الموديلات اللي ينزلونهـا حق البنـات ,

الله يخرب بيتهـم ليش ما يهتمون في موديلات الصبيـّان الصغـار مثل ما يهتمون في موديلات البنات !!





عيدكم مبــــارك .