ملتقى طلاب وطالبات جامعة الملك فيصل,جامعة الدمام - عرض مشاركة واحدة - للي وده ينجح في الاقتصاد " طق حنك بس بالمختصر المفيد "

Ezio · 2011- 11- 17

اقتباس:

المشاركة الأصلية كتبت بواسطة لسعة شقآوهـ

الله يعين والله ماينفع لاملخص ولامحتوى اذا كنا اساسا ماحنا فآهمين

يعني كيف احفظ من غير مآافهم انا من بداية الترم وانا اعيد في الثلاث

المحآضرات الاولى بس مآش مخي موقادر يستوعب هالمآدهـ

الله يسهلها ان شاء الله السبت راح ابدا في الاقتصآد وبشوف اش يصير

طيب وش رايك تفتح عيونك الحين شوي على اللي باكتبه اوكيه ؟

مثال : المحاضرة الرابعة : الطلب

الفكرة الاساسية من المحاضرة كلها ومن الفصل كله انك تعرف وش معنى الطلب ؟ ومت يزيد ومتى ينقص

هذه هي السالفة وفي الاخر حنسوق

طيب افصلها لك بزيادة شوي
اذا زاد سعر السلعة في السوق وش يصير ؟ ايوه صح شاطره بتنقص كمية الطلب عليها " بدل ما الناس تطلب الرز مثلا 50 كيلوا بيصيروا يشترون ابو 20 كيلوا لان سعره زاد "

طيب واذا نقص السعر ؟ عاد مايحتاج لها اجابة

طيب هنا خلصنا نص المحاضرة :)))
النص الثاني من المحاضرة

طيب لو جين ولقينا ان السعر لسلعة ثابت ما تغيير لكن الناس قامت تطلب كميات كبيرة منها !!!! هل معنى ذلك ان قانون الطلب حقنا غلط !!!!!
احنا قلنا اذا زاد السعر قلت كمية الطلب واذا نقص السعر زادت الكمية
بس الحين السعر ثابت والكمية زايدة اجل وش السالفة ؟

اقولك السالفة كالتالي :
اذا زاد كمية الطلب في ظل ثبات السعر معناه ان في عوامل اخرى اثرت على هذه الزيادة او النقصان طبعا في احيان اخرى وهذه العوامل هي :
1- اذا دخل الشخص زاد فراح تزيد الكمية المطلوبة والعكس صحيح .
2- ذوق المستهلكين : يعني الناس مجنونه في الايفون بيزيد الطلب عليه .
3- عدد المستهلكين زاد
4- اذا زاد السعر في السلع البديلة يزيد الطلب على السلع الاصلية :
مثلا الدجاج سلعة بديلة للحم ( سلعة اصلية ) لانه غالي
لكن لو زاد سعر الدجاج وماصرا فيه فرق بينه وبين اللحم اكيد بتروح تشتري لحم
وكذا زاد الطلب على اللحم بسب ارتفاع سعر الدجاج

5- اذا زاد سعر في سلعة مكملة مثل السكر مافيه فايده منه لحالة لازم تستخدميه مع الشاي او مع الحلى يعني اثنينهم يكملون بعض
فلو ارتفع سعر السكر بتتركيه ولكن هل في هذه الحالة بتروحي تشربي شاي بدون سكر ؟؟
اكيد لا فبتتركي الشاي بس وكذا بيقل الطلب على الشاي والسكر بسبب ارتفاع السعر

يعني هذه عوامل مؤثر بسيطه والمفروض نعرفها من خلال تجاربنا

انتهت المحاضرة وبس

سلام يا كرام