ما اقدر اشرح لك شعوري وآعترف لك بغلاك
وما اقدر اوصف لك علوم ٍ شبّت بقلبي حريقة
لو نويت ابدي المشاعر تاه من فمي الكلام
ولو نويت ابدي غرامي كيف بالقى لي طريقة
بالجمال اللي بهرني ميّزك رب الانام
وبالكلام اللي سحرني ميّزك رب الخليقة
وجنتك بدر ٍ تعلّى ونظرتك ترسل سهام
وشفّتك ورد ٍ تحلّى منيتي اجني رحيقه
العذوبة من صفاتك والادب والاحترام
يا فريدة باللطافة والاحاسيس الرقيقة
المُنى يقرب فؤادي منك ويزيد الوئام
فرحة العاشق كبيرة يوم يتلاقى برفيقه
علميني كيف ابيّن لوعتي وابدي الغرام
وعلميني كيف اخلّص منطقي مما يعيقه
افهمي قول ٍ تحرّر وافهمي قول الغلام
وافهمي قصد المولّع صاحب النفس الغريقة
اعذريني لو بقيت بموقفي واخفِي الملام
واسمحيني لو كتمت بداخلي سر الحقيقة
بالسلام ابدا كلامي وانتهي باعذب سلام
وارسل اشواقي وتحيّة الف مرّة بالدقيقة