آسف جداً ... شكلي علقتكم ... بس ترى أنا معذور و السبب في تجزيئ القصة أنها .. القصة جديدة و أنا مازلت أكتب فيها و انزل اللي اكتبه أول بأول .... و اللي حاب يقراها كاملة يدخل على القصة بعد اسبوع تكون إن شاء الله اكتملت ،،، و أرجو أني ما ازعجتكم بتجزيئها ....
مرحباً من جديد ... وآسف على التأخير في طرح الجزء الثاني ...
أنا : أنا أقول خير البر عاجله .. و إذا البنيه موافقة .. يعني بعد أذنك ممكن نعقد القرأن الحين و خاصة الشيخ موجود و الشهود موجودين ؟
أبوها : ... أنتظر لحظة أشاور البنيه ...
قام أبوها و دخل عند الحريم و بعد أشوي رجع .
أبوها (دخل و جلس) و الأنظار كلها متوجهه له و كنت أنا أنظر له كأني طرار على مسجد ههههههه :hahaha_2008:
أبوها : البنيه موافقه .. بس لي كم شريط (تصغير شرط) .
أنا : سم ... عمي أنا تحت أمرك .
أبوها : البنيه تدرس في الكلية و باقي لها سنتين و أبقاها تكمل تعليمها خاصة أنها ادخلت التخصص اللي تبيه ، وثانياً أنا ما عندي بنات تطلع مع خطيبها الحالها تبي تطلع معها بعد الملكة لازم واحد من أخوانها يطلع معكم ، و في شيئ ثاني أن ما تطول فترة الخطوبة أكثر من شهر . <<< أقول ما جبت شيئ جديد الرجال هذا اللي يبيه
أنا : ما يخالف و أنا الشقة جاهزة بأثاثها .. بس باقي العروس تختار غرفة النوم و الستائر .
الشيخ : على البركة ... على البركة ... الله يتمم على خير ... بعد أذنكم أجيب دفتر الأنكحة (الدفتر الخاص بكتب الكتاب).
خرج الشيخ و بعد اشوي جاب الدفتر و جلس و قال لبوها سوى طريق خلني أخذ وكالة العروس ..... و دخل الشيخ علشأن يأخذ وكالة منى
نظرة أبوها لي تغيرت من يوم قلت أبقي الملكة الليلة و كان يطالعني بود و عطف و أبتسامة رضا وكل أشوي يلتفت علي فرحان بي ... .. عرف أنه بيأخذ رجال نشمي مستقيم و يستاهل ويقدر المراة و يحافظ عليها و معجب بمسلسلات سانشيرو و يموت في عدنان ولينا <<< ندري ما يحتاج تقول ... ياشينك إذا مدحت نفسك :hahaha_2008:
المجلس كان فيه أخوها خالد و محمد ، و أحمد (إللي صدم) في السيارة و سبحان الله أن حبيت هالأحمد لأنه صدم بسيارة أبوه وكان سبب تعجيل موضوع الزواج <<<<<<< أدري أيبك ما يحتاج تقول
في هالوقت من السنة يكون الجو في الحسا حار .. بس ما أدري فجأة الجو ذيك الليلة صار لطيف ناعم و حلو .. أحس أن كل شيئ جميل و أحب كل شيئ في هالدنيا .... سبحان الله حتى الألوان قمت أشوفها بشكل مختلف الوردي شكله غير و الأبيض شكله أجمل و الأحمر صار يجذبني ... ما أدري يمكن هذا اللي يسمونه حب ... ما أدري صراحة لما كنت أطالع المسلسلات المصرية و أشوف هالأمور عن الحب و الهيام و العشق كنت أظن المسئلة كلها خيال في خيال .... بس الحين حتى تفكيري تغير ..
جا الشيخ من داخل و قام أخوها محمد و صب له القهوة و قرب منه صينية الفواكه و المكسرات .
الشيخ (كان فاتح دفتر الأنكحة) : لا .. خلها بعد أشوي ، كما المهر ؟
أنا : أللي يامرون به أنا حاضر .
أبوها : أحنا بنات عائلتنا مهورها عادة 25 ألف ، بس أحنا شارين رجال و اللي يجي منك بركة .
أنا : الله يسلمك و يطول عمرك ... أنا بأدفع لها مهر 30 ألف مع طقم ذهب .. زين ؟
أبوها : ما قصرت بيض الله وجهك
تمت الملكة و اتقهوينا بعدها طلع الشيخ و طلع أخوها محمد و خالد و بقى أبوها و أخوها الصغير أحمد ، و كنت أنا جالس يم أبوها و أحمد جالس يم الدلال يقهوينا .. الحين صارت الساعة 10 ... و ظليت أنا ساعة أشرب قهوة ساعة شاي و ساعة بأكل مكسرات و كل من حسيت أبوها بيستأذن أو بيلمح لي أمشي كلت شيئ <<< قلنا لكم لزقة ما صدقتوني .... هههههه :hahaha_2008:
أبوها : تبي تشوف مرتك <<<<<< الرحمة زينة الرجال شرب دلتين شاي و قهوة علشأن ما تطردونه يا أخي حس ...
أنا: ....... ( صار وجهي كتشب من الحيا)
أبوها : البنيه راحت المشغل بعد أشوي بتجي
أنا : ...... ( طالعت أبوها بنظرة شكر و أمتنان)
ررررررررن (صاح جوالي) طالعت الجوال شفت رقم أمي
أمي : هلا يمه ما جيت ؟؟؟
أنا : أنا في بيت ..... ما بعد أخلص
أمي : الساعة عشر ما خلصت من شوفتها ؟ !!
أنا : هههههههه .. لا السالفة طويلة إذا جيت أقول لش .
أمي : زين أشيل لك عشى ؟
أنا : لا يمه ما يحتاج ... تعشيت <<< أدري بتقول شوفت منى عن ذبيحة ما يحتاج تقول
أمي : طيب مع السلامة
أنا : مع السلامة .
أبوها مسكين عند دوام و هو موظف أرامكو و عنده شفت ليل وده يقوم بس مو قادر يتركني الحالي و كل حين يطالع الساعة <<<< أقول يبيك تحس يالشين .. بس ماش ههههه
الساعة صارت 11 في الليل ... و أنا بديت انعس ودي أروح أنام <<< أقول أترك عنك العيارة و ربي ما في عينك ذرة نوم
أبوها (ألتفت على ولدها أحمد) : و قال قم أبيك ...
وقف معه في التهوية القريبة من المجلس و سمعته يوصي أولده ... يقوله شف أنا بروح الدوام و إذا جات اختك خلها تجلس مع زوجها و يا ويلك إذا تركتها الحالها معه .. مو يقولون لك رح اشترى بيبسي أو جب ماي تترك المجلس ..دير بالك
بعدين جا أبوها و سلم علي و استأذن لأنه مضطر يروح الدوام و قال لي أن العروس جايه في الطريق .... <<< أبسط يا عم من أدك ... العروس جايه ...و الجو فضي ليك ... شكلك مش حتسيب البيت إلا الصبح ...ههههه :hahaha_2008:
ظليت جالس مع اخوها أحمد ربع ساعة تقريباً .. و بعدها جات منى ... ادخلت قلبي ... أحم أحم ... أقصد أدخلت المجلس .. ذاك المجلس أللي شهد ولادة حبي الأول و نبضات العشق و الهيام و الوله ......
اشوفكم في الجزء الثالث .... و لا تستعجلون علي
.... تصبحون على خير