وعليكم السلام ورحمة الله وبركاته.
مرحبًا أختي (طالبة آدآب).
أولًا: شيء جميل أنك تكونين عارفة وش تبين بالضبط, وأنك ما دخلتي هذي الكلية إلا وأنتِ عارفة التخصص اللي تبين. لأن البعض ما يفكر في هذا الأمر إلا بعد دخول الكلية!
والأجمل أنك تقولين أنك دخلتي أدبي عشان هالتخصص, وهذا بحد ذاته شيء مهم وجميل فيك.
فـ وين المشكلة هنا بما أنك دخلت الكلية اللي فيها التخصص اللي تبين وماشيه صح وإن شاء تدخلين التخصص اللي تبغين؟
المشكلة في كلام الناس! شوفي يا أختي نصيحة مني حطي كلام الناس على جنب مو بس في الدراسة, لكن في كل الأمور, أنا لما دخلت أدبي قالوا لي ليش ما دخلتي علمي, مع أقدر أدخل علمي وأتفوق فيه, ولما دخلت كلية الآداب قالوا لي نفسك: ليش ما دخلتي التربية؟ مع أن نسبي ولله الحمد تدخلني الكلية اللي أبيها, لكن لأن عندي هدف محدد وطريق واضح أنا وين أبي أكون, وكنت متوقعة هذا السؤال, لأن كل شخص يشوف الأمور من وجهة نظر أخرى, يعني يمكن وحدة تقنعك بدخول كلية معينة لأنها تشوف أنها الأفضل بالنسبة لك وماقصدها إلى الخير لك, لكن أنت أعرف بنفسك والشيء اللي تبغينه, هذا ما يعني أننا ما نسمع كلام الناس أبد, لا مايمنع نسأل ونستشير الآخرين ونأخذ آرائهم, لكن القرار الآخير لازم يكون من داخلنا.
طيب تعالي نأخذ الأمر من ناحية أكاديمية: اللحين ليش الناس تقول تربية وتربية؟ السبب البسيط: لأن الشهادة التربوية أفض من ناحية التوظيف في المدارس, يعني لو يكون فيه ثنتين كلهم نفس التخصص ونفس المعدل, لكن وحدة تربية وحدة آداب, على حسب علمي يختارون التربية. لكن لو وحدة تخصص انجليزي آداب, وحدة تخصص آخر تربية, وهم محتاجين الانجليزي طبيعي بيختارون اللي تخصصها انجليزي.
التربية يدرسون مواد تربوية كثير في كل فصل, ويؤهلونهم للتدريس بشكل كبير, عشان كذا تكون الأولوية لهم في هناك المدارس, لكن يبقى أن هناك المعدل والتخصص المطلوب هو المحك في هذا الأمر.
والآداب معروف أنهم يكونون أقوى في العلم والتخصص.
طيب تعالي نشوف لو أي وظيفة أخرى عندهم آداب وتربية, وين تتوقعين يختارون اللي مؤهلة للتدريس اللي هي تربية, أو الأقوى من ناحية التخصص وهي الآداب, طبيعي بيكون الاختيار للآداب. طبعًا هنا أتكلم عن جميع التخصصات مو شرط الانجليزي.
والتربية مافيها إلا تخصصين تربية خاصة ورياض أطفال, ومجالات العمل فيهم محدودة. هذا إضافة إلى أن هذه التخصصات مش من ميولك. فكيف تدرسين أربع سنوات في شيء ماتحبينه, وحتى لو توظفت بعدين هل تتوقعين أنك راح تعطين في تخصصك وعملك مثل لما يكون شيء أنت تحبينه ومستمتعه فيه؟ لاسيما أن تخصصي( التربية الخاصة ورياض الأطفال) مش مثل بقية التخصصات الأخرى لأنها تحتاج شخص فعلًا داخل هالتخصصات برغبة أكيدة, لأن في العمل لهذه الوظائف أنت راح تتعاملين مع (ذوي الاحتياجات الخاصة + أطفال) فصعبة أن شخص يدخل هذي التخصصين وهو مش راغب فيهم.
وبالنسبة لتخصص اللغة الانجليزية في كلية الآداب, كثير ما يعرف الخطة بالضبط وأيش نوع التخصص لأن اللي قبلنا اللي هم التربية كانت دراستهم أدب.
لكن بالنسبة للتخصص الآن هو يتبع خطة جديدة تعتمد على الموازنة بين متطلبات (الأدب, اللغة, الترجمة). يعني أحنا اللحين ندرس مواد أدب ولغة وترجمة. ومسألة أننا نختار في سنة ثالثة ترجمة أو لغة أو أدب فغير صحيح.
لكن في آخر سنة في مادة اسمها مشروع تخرج, وهذي المادة لجميع كلية الآداب لجميع التخصصات, لكن تخصص الانجليزي طبيعي بتختارين مجال لبحثك اللي هو مشروع التخرج وهذي المجالات اللي هي لغة, أدب وترجمة.
وعذرًا طولت كثير كثير, لكن دايمًا كذا ما أعرف اختصر :)
المهم أي استفسار أنا حاضرة..
بالتوفيق..