السلام عليكم ورحمة الله وبركاته
مبارك عليكم الشهر
أنا حلمت حلم من يوم يعني برمضان بس حلمته بالنهار
حلمت إني كأني بالجامعة أكلم الدكتور بس ماأذكر وش قلتله وكأن معاي بنات بس مو كثير
وفجأة شفت روحي في غرفة صغيرة وكانت مفروشة فرشة عادية وكنت جالسة على الأرض وكأني
أكتب في دفتر أو أحل واجب وكنت منزلة رأسي أكتب إلا شفت أمراة قاعدة قبالي من مسافة بس
مو بعيدة ولابسة عباءة سوداء بس ماعليها غطوة وشعرها مفتوح وشوي سمينة وسمرة شوي
وملامحها مو واضحة بمخي كأني شايفتها من قبل وكأني أول مرة أشوفها المهم قالتلي ها بشري
عسى حملتي بعدين رفعت راسي مستغربة من سؤالها قلت لها ومن اللي قالك أني تزوجت
بعدين سكتت وقمت أعلمها سالفة صايرة لي من 3 شهور لأني كنت مخطوبة ساعتها بس صارت
مشكلة على المهر وأتفركش كل شئ وكأن هالمراة اللي في الحلم كانت تدري أني مخطوبة
وتفكرني تزوجت وبعدين شافتني في الحلم بعد مدة وقالت لي عسى حملتي وبعدين أنا قلت
لها عن سالفة الخطبة وش صار فيها وان كل شئ تفركش علما إني لحد الأن زعلانة شوي على
سالفة الخطبة ودايما أفكر فيها بس شسوي كان الرأي رأي أبوي هو اللي أنهى كل شئ وأنا
سكتت ماقدرت أجادله أو أوقف بوجهه لأنه أكيد يبي مصلحتي
هذا الحلم كله بتفاصيله وأتمنى تفسرونه لي
الله يجزاكم خير