في غربتي عن هلي الدعوة منهم دليل
منها تيسّرلي كل اموري فدنيتـــــــــــي
الدعوة اللي من امي تنعرج كل ليل
هي سبب كل راحه وهي سبب فرحتــــي
الغربه كم فرقت مابين خل وخليل
وانا عن اطهر شموخ مااحشمت شرهتي
مااخترتها لكن الدنيا مداها طويل
دايم تعشم خفوقي أقرب لديرتي
هانت يايمه ترى ماباقي إلا القليل
وانهي محاكاتكم وتنتهي حيرتي
يايمه الحمدلله بالي ماهو عليل
متوكل بالإله اللي خلق بنيتي
صبرا جميلٍ مدام الصبر وصفه جميل
واعظم بشارة لكي ماقد هفت هيبتي
وش وضع جداننا يوم انتظار الرسيل
لاتقنيه عندهم /يابسطها قصتي
صحيح اني غديت بوقتي عابر سبيل
لكن مع العالم آخذ/ بالوزن حصتي
يايمه والله لو اني احملك الف ميل
وأبقى قدم عينكي ثابت على وقفتي
والعين ماترتخي بالليل لين المقيل
وماتهتني لو ثواني في صفا نومتي
وأعيد هذا الفعل في كل صبحٍ وليل
ماوفّي اللي بذلتي بس في نشأتي
العطف منك غمرنا وسال بالقلب سيل
شوفك يبدل حزن وجهي إلى بسمتي
لو نجتمع بالعطا مانوصلك لو نكيل
كفة عطاكي ترى ماتحس في كفتي
ياطهر هذا الزمن ياكل وصف جليل
يامدرسة بالنقا ياملهمه صفوتي
ياطيب كل البشر ياكل فعل نبيل
ياموصية بالوفا يامشيدة هامتي
أرجو السموحة يايمه بالبعاد الثقيل
لواني اشوفكي في نومي و قومتي
حتى لو اني ازورك والله ماهو كفيل
ودي بتقبيل راسك والرضا هقوتي
يااخت الرجال الجبال اللي فعلهم جزيل
اهل النقا والوفا معهم علت نشوتي
من اصغر اخوانك الين خالي محيل
الفخر معهم نشى وأفخر أنا بعزوتي