السلام عليكم ورحمة الله وبركاته ..

رحت قبل شوي أشيك على موقع مدارس المتوسطة (202) اللي فيها الأختبارات هالترم وأتاكد من الوصف مضبوط ..

فحبيت أشارككم الوصف وبحاول أجيبه من كل الاتجاهات الاقرب لكم ..

أول وصف (1) طريق عثمان بن عفان للناس اللي ساكنة على هالمخرج ( حي الفلاح ، الوادي وغيره ) ..

امشي على طريق عثمان بن عفان ( مخرج 7) بإتجاه الجنوب عدي إشارة طريق الأمام سعود بن محمد ، وإشارة الأمير مقرن بن عبدالعزيز .. امشي حبتين قدام راح تشوفين مغاسل الرهدن على يمينك ، إدخلي بعدها يمين وبعدين اجباري يوديك يمين خلف المغاسل .. وبعدين بتشوفين سور المدرسة على اليسار .. ( المدرسة كبيرة وواضحة ) ..


ثاني وصف (2) طريق الدايري الشمالي للناس اللي جاية مع الملك فهد متجهين شمال ..

طبعاً بتكونين ماشية على طريق الملك فهد وبتطلعين على الدايري الشمالي بعد هايبر بنده والعزيزية مول اللي ع الملك فهد .. وتمشين ع الدايري وبتجيك المخارج (5 -6 -7 ) ..
إذا شفتي مخرج (7) اللي هو عثمان بن عفان اطلعي معه وخذي يمين اللي هو جنوب عثمان .. وامشي نفس الوصف اللي فوق .. ^^ ..

ثالث وصف (3) طريق الملك عبدالله بإتجاة قصور العويضة ..

امشي مع الملك عبدالله خلي سوق صحارى على يسارك وامشي قدااام كأنك رايحة قصور العويضة .. إذا شفتي القصور اطلعي ع الخدمة وخذي يسار من عند الإشارة يعني بتصيرين تمشين على عثمان بن عفان ، وانتي ماشية ع الشارع بتشوفين مغاسل الرهدن يسارك ، سوي يوتيرن مع عند اشارة تقاطع الأمير مقرن بن عبدالعزيز مع عثمان وادخلي بعد المغاسل يمين .. وحيوديك اجباري يمين وبتشوفين سور المدارس ع اليسار ..


اخر وصف (4) الدايري الشرقي .. للناس اللي جاية من الشرق ( الروابي - الروضة - الربوة وغيرهم ) ..

امشي مع الدايري الشرقي والله يعينك ع الزحمة .. كأنك متجهة لسوق غرناطة .. واطلعي مع مخرج (8) وامشي معه بيجيك جامع التوحيد عديه بعدين بيجيك مخرج ع اليمين يودي لعثمان بن عفان امشي معه يمين وخليك يمين لا تطلعين فوق الجسر بعدين سوي يوتيرن من تحت الجسر وامشي قدام وادخلي يسار على الشارع الرئيسي وامشي نفس الوصف رقم (1) فوق ^^ ..



إن شاء الله يارب يكون وصفي واضح لكم كلكم .. وحاولت اوضح الوصف بطريقة توصيف البنات لإننا غالباً ما نعرف حركات اذهب شمالاً وانعطف شرقاً وذا الخرابيط ..

وشكراً لكم جميعا .. والله يوفقنا جميعاً في الاختبارات ..