طيب أبقولك من البداية طريقة تسلسل الحل ..
أول شي إحنا نجيب التكاليف خلال الفترة وهي عبارة عن التكلفة الأولية (والتكلفة الأولية عبارة عن المواد المباشرة والأجور المباشرة ) بعدين نجمعهم مع بعض ونجمع عليهم التكاليف الصناعية الغير مباشرة وهو احيانا يعطيها لنا بدون تعب وأحيانا يعطينا مجمل الساعات ويعطينا المعدل ونضربهم في بعض عشان يعطونا التكاليف الصناعية الغير مباشرة ..
الحين بعد مانجمعهم كلهم الحين نبي نسوي تكلفة الإنتاج التام وهو عبارة عن مجموع اللي سويناه من شوي ونضيف عليه مخزون تحت التشغيل أول الفترة ونطرح منه مخزون أخر الفترة ..
الحين طلعنـا الإنتاج التام ( اللي تسألين عنه )
حلو الحين نبي نطلع الإنتاج المباع وقلنا الإنتاج المباع هو عبارة عن الإنتاج التام اللي طلعناه من شوي ونضيف عليه مخزون الإنتاج التام أول الفترة ونطرح منه الإنتاج التام آخر الفترة ...
الحين هو معطيني مخزون الإنتاج التام أول الفترة بالريالات ماعنده اي مشكلة ..بس المشكلة في مخزون الإنتاج التام آخر الفترة لأنه معطينا بالوحدات وهنا مانقدر نجمع الريالات على الوحدات اصلا يعني لازم نشوف لنا طريقة ..
الطريقة هي كالتالي ..
لو تلاحظين هو لما أعطاني مخزون الإنتاج التام آخر الفترة بالوحدات عطاني بعد عدد الوحدات التامة الصنع عشان استفيد منها ..
كيف بتستفيد منهـا..؟
أول شي من اسمها هي عدد الوحدات التامة الصنع يعني جاهزة وكاملة وإحنا من شوي لو تتذكرين طلعنا تكلفة الإنتاج التام ..
معناته نقسم تكلفة الإنتاج التام على عدد وحدات الإنتاج التام الكاملة عشان وشوو.؟ عشان نطلع سعر الوحدة الواحدة من الإنتاج التام
وبكذا صار السعر حق الوحدة الواحدة معنا نروح الحين للمشكلة اللي سوينا هالزحمة عشانها وهي مخزون الإنتاج التام آخر الفترة ونضربه بالسعر اللي طلعناه وأتوقع كان 12 وبعدين نكمل باقي الإجراءات
الحين المفروض طلعنا التكلفة المباعة ( الإنتاج المباع ) خلاص الحين هو طالب في السؤال مجمل الربح ..
ومجمل الربح يساوي الإيرادات (المبيعات ) - تكلفة البضاعة المباعة ( اللي طلعناه من شوي
طبعا الإيرادات مو معطينا اياها صريحة في السؤال بس نقدر نجيبها من خلال المعطيات ..
المعطيات اللي بنستخدمها هي عدد الواحداات التامة الصنع نضيف عليها مخزون الإنتاج التام أول الفترة ونطرح منه عدد وحدات مخزون التام آخر الفترة
طبعا بعد مانطلع الناتج نضربه في سعر الوحدة المباعة واللي هو 16
وليش هالزحمة عشان نعرف كم حنا بعنا ( اللي هي الإيرادات )
الحين الناتج هذا يعبر عن الإيرادات ونطرحه من تكاليف البضاعة المباعة ( اللي طلعناه من قبل ) وبكذا نحصل على مجمل الربح ..
أتمنى إني وفقت في توصيل المعلومة والله يوفقنا واياك يارب ويسهل أمري وأمرك والجميــع ..
تحيـاتي