يقولون ماللعبد بد.ن على المقسوم
وانا اقول صح ويقنع العبد مقسومه
عسى الله يعين اللي توافد عليه هموم
هموم.ن تخلي طبله الراس منجومه
ترا والله انه مايكدر عليك النوم
سوا كلمه.ن من بعض الاصحاب مسمومه
الا جت من الغالين والا الرخوم رخوم
ولا امحق من الغالي اليا شانت علومه
ضعاف الروابع تبتلش والقروم تشوم
ولاهيب لاشامت من الشيب مليومه
ولا ازين من القاع الخلا والوجيه سلوم
ولا رفقة.ن مع طول الايام ملغومه
ولا الذ من عشره شريف.ن من اقصى القوم
يبادلك فعل الطيب معناه وسلومه
ولا شفت في جو الصداقه غبش وغيوم
عطيت الدروب اللي مع الارض مرسومه
ولا مثل عز النفس لو مامعك مطعوم
وعن اهل الشماته خل الاسرار مكتومه
معي لو سمحت شوي عقب.ن عداك اللوم
ابعطيك عن بعض الرجاجيل معلومه
ترا اللاش لو وقف معك في حياته يوم
تشوف الردا متبين.ن فيه من يومه
وانا اقول لو ان في وجيه الرخوم وسوم
عرفنا نميز قيمه النذل بوسومه
علشان نجلس مع رجال الوفا ونقوم
ونبعد من اللي عند الاجواد مذمومه
وانا اسمع مع اهل التجربه في الحياه علوم
بعضها صحيح وبعض الاخبار موهومه
يقولون وكر الحر مايعتليه البوم
وانا شوف عيني وكر حر.ن تحت بومه