هيا بنت خالتي مرة تحزن تفتح الكتب الي تدرسها فيها ابلة ريم وابلة سوزان الله يرحمهم وتبكي وسارت تخاف حتى من صور النار صورة بس تخاف منها وفي المدرسة الي نقلوها الـ91 الابتدائية سرلهم ماس كهربة والبنات يبكو مررة يحزنو والبنات سارو يخافو من الجرس حق الحصص فسار مايدق عشان البنات لا ينفجعو و يحسبو حريقة فسارو بصفيرة
انا كلمت بنت من براعم الوطن اسمها لجين الحلواني كلمتها قلتلها كيف خرجتي من الحريق قالتلي اول شي كنا في الفصل وكنت اصرخ على البنات عشان ينزلو تحت يخرجو والبنات خايفين مانزلو فراحت هيا وصحبتها سارة نزلو لقو النار قامو جريو على فوق و طلعو السطوح و نزلو بالسلم
وسجى الحجيلي هيا و اروى ماكانت تبا تنط من دون سجى عشنها صحبتها بس ماقدرت تستحمل ونطت وسجى نطت كمان من الدور الثالث و طاحت سجى على الارض و مدري ايش سرلها في العمود الفقري و انكسرت رجلها الله يشافيها و عشان في هذي ايام اختباراات فسارت كل يوم سجى تيجي تختبر وترجع
وفي بنت مااعرف ايش اسمها الصراحه بس هيا مادوامت من اليوم الاول والبنات حسبوها نقلت من المدرسة بس في يوم جات امها وحكتهم قصتها هيا من الخوف فكت شباك فصلها ونطت هيا كانت تحسب انو الشباك يخرج على برا بس هوا كان يطل على درج جوا المدرسة نطت على الدرج و اتعورت وكان هذا الدرج درج للمسرح بس باب المسرح كان مقفل اتدردبت البنت وانخبطت في باب المسرح وانخلع كتفها الله يشفيها
وشوق الزهراني هيا كانت مع البلة ايمان ونرسيان كانو هما 15 بنت في الغرفه بس ومع ابلة اسمها منصورة هيا من الخوف ماقدرت تنط ومن الدخان ماقدرت تشوف كل ماتقول خلاص حأنط تروح تبغا تنط تشوف البنات يطيحو على الارض وعلى الحديد و من بعد السافه خافت وماقدرت تنطت استخبت تحت طاوله ومابقي غيرها هيا وصحبتها والكلهم نطو الا هيا ماكانت تعرف ايش سار لنرسيان اصلا مااعتقد انها كانت تفكر فيها المهم استخبت تحت طاوله الين مااغما عليها وجا شافها رجال واخذها و خرجها الحمدلله واسعفوها لانو كانت جروحها عاديه الحمدلله ماراحت المستشفى على طول سوو معاها مقابلة
الي مقهورة منو انو هيا تعبت بسببي انا كنت تعبانه عديت بنت خالتي وبنت خالتي عدت شوق وشوق غابت 3 ايام :(
ابلة منصورة نطت وطاحت على الخشب وهيا الابلة عندها ربو فكانت بس تكح ومتفحمه مو من نار من الدخان كانت مرررررة سوده نطت طاحت على الخشب سارت تقول للمتطوعين ارمولي طرحه ارمولي طرحه هما من فين يجيبو طرحه رمولها سجاده راحت تصرخ عليهم انا حرانه تروحو ترمولي سجاده
استغفرالله الابلة قصتها تضحك استغفرالله الحمدلله على سلامتها
هديل محمد احمد الغامدي مااعرف ايش سرلها بس هيا نطت من الدور الثالث بس الحمدلله مارسلها شي
وهذا الي اعرفو تقريبا او حاسه اني ناسية شي بس مدري ايش هوا المهم الحمدلله على سلامت الجميع ووالله يعوض عليهم وكنت ابغا اقلكم شي كمان سار اليوم بس حسيت اني زودتها يعني سامحوني اذا زودتها مررة معاكم واذا تبغو تشوفو المدرسة من جوا روحو الفيس بوك اكتبو sama sabban وهيا ماشاءالله حاطه كل شي ومتواصله مع ام عندها ولدها وبنتها في براعم الوطن ومعليش طولت عليكم باي