اهلا اختي ومبارك التوفيق وجعلها خطوة مباركة ومفتاح خير عليك وعلى كل من يقرأ يارب .
أحب اعطيك شرح موجز عن المواد لأني اشوف الاسم لحاله مايكفي عسى يفيدك.
أول شيء راح تنزل لك ثمان مواد تلقائي مجرد ما تسجلين وهن كالتالي.
1- العقيدة الاسلامية : وتتحدث عن عقيدة المسلمين الصحيحة ومذهب اهل السنة والجماعة ، وعن التكفير واحكامه وعن بعض المذاهب والتيارات مثل عبدة الشيطان والعلمانية والصهيونية والنصارى .
المادة ممتعة جدا جدا .
2- النحو التطبيقي 1 : وتتكلم عن مباديء بسيطة بقواعد النحو العربي مثل المعرب والمبني وعلامات الاعراب احيان تكون حركات مثل الضمة والفتحة ... الخ و احيان تكون حروف مثل الألف نيابة عن الضمة وهكذا .
المادة رائعة جدا وتحفزك تتابعين خطباء المنابر وتشوفين الأخطاء الفادحة هههههه .
3- اللغة الانجليزية العامة : يس آند نو بيكوز سبتمبر بلاي ستيشن خخخ . سهله ورائعة وتتكلم عن قواعد سهله جدا جدا بالانجلش مثل الماضي والمضارع .
المادة سهله ومهضومة .
4- مباديء الادارة : اللي خوفوك منها ههههههه وراح اخبرك ليه الكلام كثير حولها . شوفي يا اختي المادة بطبيعتها تتكلم عن الادارة والمدير والموظفين وانواع الادارت وكيف يكون المدير ناجح وكيف تدار الشركات والاعمال . لكن الدكتور صعبها شوي باستخدام مصطلحات وكلمات فضفاضة تلخبط شوي مثلا . بدل مايقول لك المدير يستبدلها بكلمة المسؤول وهكذا .
المادة تحتاج جهد شوي اذا الدكتور نذير عليان اسمه .
5- التحرير العربي : وهو امتداد لمادة النحو ونفس المعلومات اللي بالنحو بالضبط اللهم زايد فيها بعض الحاجات مثل علامات الترقيم (!،؟.) وكيف نستخدمهن ومثل الرسالة والقصة والملخص كيف نسويهن .
المادة رائعة وسهلة ومفيدة جدا .
6- الصحة واللياقة : من أروووووع المواد وتتكلم عن حاجات المفروض يعرفها كل شخص . ولا اعتقد راح يمر عليك شيء جديد فيها لأنها معروفة بحياتنا اليومية اللهم انها تزيد قناعتك انك بدل ما تستخدمين قرنفل مطحون على الجرح اللي ينزف تستخدمين رباط طبي ههههههه.
المادة رائعة وممتعة ومفيدة وقيّمة .
7- مهارات التعلم والتفكير : مادة سهلة جدا ومحتواها مايتجاوز ثلاثين صفحة وتتكلم عن التعليم والعلم والتفكير والتلخيص والتوثيق .
8 - مدخل الى تقنية المعلومات : من اجمل المواد واعتقد انه مستحيل احد يدرس تعليم عن بعد مايبدع فيها لأنها كلها تدور حول الكمبيوتر والانترنت وخصائصهن ولا فيها تعمق كبير .
المادة رائعة وتفيد اي شخص يستخدم النت .
اتمنى لكِ التوفيق يارب واتمنى اني ماثقلت بمداخلتي . لكن حبيت اوضح لك بعض اللي اعرفه .