بس بالنظر صرت من نظرات مفتونها
من النظره الأولى طحت باقصر حبالها

ملعونـةٍ صابـت النيشـان بجفونهـا
خلتني أصعد سلالم شـوك واسعالهـا

بنـات حـوّا عمـومـاً مايحبّونـهـا
والكره يقلب دبل ليـا رمـت شالهـا

ماقول تسواهـم أو آقـول يسوونهـا
آقول هي السّـوات بكافـة أشكالهـا

ليا مشت يادخيـل الله علـى هونهـا
ومن يحترق يحترق طيب وهي مالهـا ؟

تمشي دلع والقلوب الخضـر يتلونهـا
بنت الحلال إبتلت تمشي علـى فالهـا

يحلالها إنـي مسنتـر عنـد دروبهـا
إنـي آتلـوّع بنـار الحـب يحلالهـا

يقول وش علـق الطربـان بلحونهـا
مايـدري إنـه نبيـل شعيـل غنالهـا ؟

مادام حلـوه ياقلبـي والبنـي دونهـا
دلوعة لازم تصيـر وشايفـه حالهـا

إن قلتوا مجنون أنا بالعشـر مجنونهـا
وخل العرب تضرب الأمثال بامثالهـا

المشكلـه مانـي بعـارف تليفونـهـا ؟
ولاني ولد عمها ولانـي ولـد خالهـا

ماغير أسمّي عليها أخـاف يرمونهـا
ياليت لي حيلـةٍ فيهـا وانـا احتالهـا

أغـار مـن أمهـا لاقالـت شلونهـا ؟
وأغار من كـل شـيء يقعـد قبالهـا

واغار من عطرها ومن كحلة عيونهـا
واغار من ثوبهـا الأزرق وسلسالهـا

لو هي تسلـم علـي آكـون ممنونهـا
لو بس تحط إسمي على جدول أعمالها

هي بـس تشّـر انـا لبيّـه ياعونهـا
هي بس تامر آنـا امـوت وأحيالهـا

أشوفهـا شـي أمثـل أن يسمّونـهـا
أسمى مـن إنـي أسمّيهـا بأسمالهـا

مدينتـي الفاضلـه وانـا افلاطونهـا
قوميتـي العربيّـه وانــا جمالـهـا

مقدّمـه خالـده وانـا إبـن خلدونهـا
رقـي نرقابهـا وشمـوخ نرقالـهـا

هي دولة الحب والاحسـاس قانونهـا
هي جايزة نوبل اللـي ماحـد نالهـا

صحيـح بـدري عليهـم لايطولونهـا
لكني أول وانا أوّل شخـص طالها

بالطيب بالغصب واللي خلق كونهـا
طقـت براسـي ودبّرهـا ياحلاّلـهـا