غربة .. كثير اللي كتب غربة الروح
................ وانا اتعثر في زحام الحناجر
قلت اكتبك من باب قدسية النوح
................ زيف المدينة .. وكبرياء المحاجر
هذا الوطن يا صاحبي حفنة جروح
............... ولا هو خطا الأوطان حزن المْهاجر
ماهو فقير اللي رسم حلم وطموح
............... وماهو قتيل اللي في ظهره خناجر
مفتاح صبر .. وباب الأقدار مفتوح
............... وقيود طين وصوت الأيام زاجر
اطلق سراح الصمت بتموت مفضوح
............... والناس قد شافتك ديِّن و فــاجر
إن عشت غربة .. وين إذا ضقت بتروح؟!
............... وإن غربوك النـاس .. تقدر تهاجر؟؟!
شف وانت بترتل وجع غربة الروح
............... كم لك تَعّثَّر في زحام الحناجر؟!
الشاعر عبدالعزيز بن سالم