بعض قصائد الأمير عبدالرحمن بن مساعد
قصيدة: مجلــس رجــال
مجلس رجال
على اليسار مقلـّط .. وعلى اليمين صالة
ضيوف جالسين
قهوجي يلم الفناجين
وينطر أخر ضيف منهم يهز فنجاله
ضيف يقبل من بعيد
يقوم صاحب المجلس طلال لإستقباله
شخص جالس على اليمين يهمس لجاره :
" هذا أحمد إللي جاي بس ماهو لحاله "
" من معه ؟ "
" يبدولي اطفاله "
ويدخل أحمد معه ثلاث أطفال
وعند باب الصاله يستقبله طلال
" السلام عليكم "
الكل يوقف
" هلا والله مرحبا عليكم السلام .. حي الله أحمد هلا وسهلا .. تفضل ..
كيف الحال ..؟ "
" هلا طلال .. أعرفك على عيالي .. إبني صابر عمره ثمان سنين ..
لاتستحي سلّم ياصابر
بنتي هاله .. ست سنين .. سلم ياثامر على الجماعة .. وش هذا اللي في يدك ؟؟
آه .. سجايري والولاعه "
عبدالمعين يطالع الساعه .. ويهمس لجاره
" كيف يجيب اطفاله ..؟! .. محد منا معه أطفاله .. ليش يجيب أطفاله "
ويجلس أحمد ويجلس حوله عياله
طلال يقول :
" ما شاء الله .. ياحليلهم .. الله يحفظهم ويحرسهم ويحميهم ..
ماشاء الله يا صابر : ايش هالثوب الجديد "
أحمد يقول وملىء وجهه إبتسامه
" هذا صابر موهوب في التقليد قوم ياصابر قلّد اصاله
والا تدري وري عمك كيف يركض سامي الجابر "
ينطلق صابر لخارج المجلس .. يرجع معه كوره يشوتها ..
تنزل من السقف ثمان لمبات مكسوره
أحمد يقول وملىء وجهه إبتسامه
" شاطر ياصابر ... شفت ياطلال شقاوة هالعيال "
طلال يتمتم :
" ياحليلهم .. الله يحفظهم ويحرسهم ويحميهم "
" تعالي ياهاله سمعيهم , و وريهم اغنيه , و رقصة الخياله
لا تستحي يا بنت مافيه أحد غريب هذا عمك طلال وهذا عمك مثيب
وهذا عمك عبدالمعين وهذا ..... لا مؤاخذه إنت مين ..؟ "
- أنا عبدالكريم
" عبدالكريم .. تخيّل يا أخي ماعرفتك لأنك يمكن ملتحي ....
لاتستحي يابنت لاتستحي ..
تدري طلال " هاله نجحت بـ امتياز "
صوت مدوي ينفجر
" آه ياثامر ما أشطنك .. كسّرت القزاز "
أحمد يقول وملىء وجهه إبتسامه
" شفت ياطلال شقاوة هالعيال "
طلال يتمتم :
" ياحليلهم .. الله يحفظهم , ويحرسهم ..... ؟؟؟؟!!!!
" وش كنت أقول أبو طلال كنت أقول هاله نجحت بـ امتياز أعطيتها البارح فلوس
وقلت لها ياهاله أيش ما تبغي إشتري "
طلال يقول
" مبروك .. مبروك .. أيش تبغي تصيري لما تكبري "
هالة تتفل على طلال .. وتقول :
" أيش دخل ابوك "
أحمد يقول وملىء وجهه إبتسامه
" شفت ياطلال شقاوة هالعيال "
طلال يتمتم :
"ياحليلهم .. الله يحفظهم ..................... ؟؟!!!
" تعال ياثامر .. عد لعمك من واحد الى العشره "
ثامر يبتدي يعد
" واحد .. إثنين .. ثلاثه .. سبعه "
أحمد يقول وملىء وجهه إبتسامه
" دايم يعد .. ولما يوصل أربعه يلخّبط "
يالله ياثامر من جديد
يبدأ ثامر من جديد
" واحد .. إثنين .. ثلاثه .. سبعه "
" شاطر يا ثامر شفتوا كيف لخبط "
ينفتح باب المقلّط ويدخل النادل شايل دخون
والصاله في حالة جنون
أحمد يصفق .. صابر , وثامر يرقصون
طلال يقوم
" العشاء .. تفضلوا ..الله يحيكم "
أحمد يقول
" يالله يا أولاد الله يحميكم .. إتعشوا أول .. بعدين سووا إللي تبون "
يركض الأولاد قبل الضيوف .. وللمقلط يدخلون
صابر ياخذ برتقاله .. يرميها على النادل .. تطيح المدخنه والدخون
ثامر هناك .. يكسر بياله .. ويرمي شظاياه على إللي ياكلون
هاله ترمي على طلال صينيه ... وتاخذ علبة مياه غازيه
تخضها .. تخضها .. تخضها .....
وترقص رقصة الخياله .. وتفتح العلبه
أحمد يقول وملىء وجهه إبتسامه
" ايوه ... هذي رقصة الخياله "
والضيوف في ثياب من المياه الغازيه يرفلون
مجلس رجال
على اليسار مقلط .. وعلى اليمين صاله
كل شي فيها ماهو على حاله
قزاز مكسور .. سجاده محروقه .. غتره مشقوقه
صينيه هناك مرميه ...
ضيوف مبللين بمياه غازيه
على وجه عبدالمعين جرح قطعي .. ومهلبيّه
نادل مصاب بـ حروق من الدرجه الأولى .... وجروح سطحيه
كوره .. لمبات مكسوره
يظهر أحمد من المقلط وملىء وجهه إبتسامه
" اكرمك الله يا طلال..شايف شقاوة هالعيال
أقول طلال .. أشكر أم العيال نوره .. العشاء كان رائع ..
ماقصرت مشكوره
عشاكم ياجماعه بعد أسبوع عندي .. لازم تشوفوا ولدي الصغير ..؟!!
آخر العنقود .. منصور .. عمره ثمان شهور .. شيطاني يعقد ..أظن له معي صوره
شوف يا طلال هالصوره .. لاتغرك نظرته .. ترى والله ذكي مره
ما يضحك ولا يبكي لما يبدأ أخوه ثامر يعد "
طلال صامت ما يرد
وترتسم على وجهه أحمد علامة إستفهام ويتساءل في داخله
" طلال كن وجهه متغير ..أكيد أحد من هالضيوف زعله
مسكين طلال .. دايم في حاله مايخلوه .. زين جبت العيال سلوه "
ويخرج أحمد من الصاله .. فخور بـ عياله
تارك وراه مجلس .... كان مجلس رجال
وعلى اليسار بقايا مقلط ... وعلى اليمين شبه صاله
" يتبع "