مساء الخير

انا متأكد ان كلنا نحب الهذره على الواتس او البيبي

ومتأكد اكثر ان كلنا نحب الخير ونبي الاجر من الله سبحانه

ومتأكد اكثر ان كل واحد دايم تجيه ادعيه واذكار واحاديث تحث على الخير مرويه عن الرسول صلى الله عليه وسلم

وتجد في اخر الرسالة ارجوا النشر ولك الاجر

انا عندي رجاء ثاني قبل النشر

انك تتأكد من صحة هالكلام وصحة الحديث او الدعاء

بتقول لي وشلون انا ماني عالم حديث ولا فيني ولا عندي وقت افتح كتب ومشغول ومدري وشو

بقولك على هونك

ربي سخر لك معلم قوقل ووقت ما تبيه بيقولك سم وآمر

انت اكتب الحديث او اللي جاك وصدقني من تكتب اول كلمتين بيفل لك السبحه معلم قوقل

وبتلقى اللي انت تدوره عاد انت ادخل واقرى دقيقه او دقيقتين وصدقني من اولها راح تعرف ما مدى صحة الكلام من عدمه ومدى صحة الحديث من ضعفه

طبعا تحرى مواقع جيده مو تدخل مثلا منتديات لاس فيقس وتاخذ بكلامهم

عندك موقع اهل الحديث موقع ممتاز واذا عطاك جواب يعطيك بالدليل والاسناد

وفيه مواقع غير كثير

كلنا حريصين على نشر الخير وسنة نبينا صلى الله عليه وسلم ولكن مطلوب منا تحري الصحة

هذا ديننا وما نرضى نشر البدع فيه

ولا تنسى تبلغ المرسل ان رسالته مضروبه

او انك تنشرها اذا كانت صحيحه

الله يوفقكم لكل خير

ويعطيكم خير من ما تمنون