تعبت اجمّع تحت صمتي سحابه
جفت عروق البال وعيوني أسراب

يا من أنا ..؟ / لو لا الأرق والكآبه
ما كان لي في وادي الجدب محراب

صليت عتمه / لين حد الإجابة
مات السؤال الصبح واستاحش تراب

الناس أكثر من شعوري / غرابه
وأنا كثير الناس / وشعوري أغراب

أطيح واقف .. أستفز / الإصابة ..
تموت من ضحكي على حالي اقراب

مدري من اشبه ؟ من كثر ما أشابه
أنا اشبه جروحي ولا تشبه حراب

من كثر ما اكتب دمع عيني كتابه
صاروا البعاد أحيان في حزني قراب

في النافذة شمس وطيور وسحابه
وفي دفتري ليل , ومواويل , وغراب