بعون الله وتوفيقه نقول :


الموقف هذا صار لخوي الصغير وهو وخالي


القصه تقول :


علشان توضح لكم الصوره اكثر - خالي لايعرف يكتب ولايقراء ومايعرف انجليزي وهذا هو محور سالفتي


جانا خالي من القصيم للرياض وجلس عندنا حوالي اسبوع
طبعا جاي مع واحد من الجماعه ومخلي سيارته فالقصيم

اخوي الصغير كان يشتغل في الخطوط السعوديه في المطار قبل يروح مطار ثاني

خالي بعد يومين الا مسكت معه يروح طياره للقصيم - قلنا له يابن الحلال
ماهب لازم شف احد ماشي للقصيم ورح معه والا اذا صرت مخربها

التكاسي واجد - الا ماسكه طياره - ودق على اخوي يبيله حجز في اقرب وقت

قاله اخوي مافيه الا بعد يومين - قال انت منتب رجال انا اكلم ابوك

ودق على ابوي وقاله ولدك مافيه خير ماسوى لي حجز - دق ابوي على اخوي

وقاله اخوي ان مافيه حجز - اليوم الثاني خالي مسك اخوي وهو طالع الدوام وعطاه كم كف

على الطاير ههههههههههه وقال اليوم ابي حجز - وقال اخوي طيب ابشر

الظهر العصر المغرب اخوي مادق على خالي علشان الحجز

بعدها خالي راح للوالده وقال لها السالفه - الوالده دقت على ابوي وقالت شف اي وكاله سفر احجز لخال العيال

ابوي بس سكر من عند الوالده دق على اخوي وقال له تطلع لخالك حجز باي طريقه

شكل ابوي يتميلح عن الوالده مسوي قوي ههههههههه

اخوي - قفلت اخلاقه وحجز لخالي على مدينه القيصومه اللي جنب حفر الباطن

وحط اسم خالي وقص التذكره وكل شي - واخوي طالع من الدوام مر الادره حقته

واخذ اجازه يوم اطراريه ومشى للبيت - وصل البيت وعطى خالي التذكره والنفوس طيبه

ثاني يوم قال اخوي لبوي يودي خالي المطار وافق ابوي -

ابوي طلع مع باب الريجيل هو وخالي - اخوي طلع مع باب الحريم باغراضه مناحش للشرقيه

عنده اجازه يوم مع خميس وجمعه - وصل الوالد المطار وركب خالي رحله القيصومه على باله القصيم - الين قال سلام يالقيصومه - يوم نزل من الطياره - دق على اعياله يجونه

قالو حنا لنا ساعه ننتظرك برى البوايه - طلع خالي تلفت يمين ويسار - وسال واحد واقف

هذي اي بوابه وقال له مافيه الا بوابه وحده بس انت وين تبي ياشياب

قال خالي ابي بريده - ضحك الرجال لين طاح من الضحك وقال وينك وين بريده انت فالقيصومه

وزعل خالي وطلق بالثلاث انه لو يمسك اخوي انه ليقطعه - ذيك الليله خالي امرح في القيصومه عند واحد ماندري منهو

ثاني يوم اخذ تكسي وعلى الرياض يبي اخوي - يبي يفقع وجه

مالكم في الطويله- ابوي وامي يدقون على اخوي مقفل جواله


في الاخير - اخوي اعتذر من خالي وحب راسه وسوء له عزيمه وذبح له حااشي صغير

يقولون اخوي ذالك اليوم في العزيمه كان على كرسي متحرك من كثر الضرب اللي جاه

من خالي وامي وابوي علشان المقلب


بس الحين صار اخوي هو اغلا واحد عند خالي

قلت ايه ربا ضاره نافعه


وسلامتكم