ِلاح الحزن في ليلة واجهر الشوف
يبرق ويرعد في النواظر سحابه
بين النواظر صار بين ومكشوف
في ساعةٍ نوخ وعد الركابه
من سبة اللي مات وعيوني تشوف
فوق الصدر نزاع الارواح صابه
جاه ونزع روحه واخذها من الجوف
قدام عيني راح مني نهابه
مات وترك راسه على الصدر منسوف
جسمٍ بليا روح كلٍ درابه
صار الحزن في خاطري يشهر اسيوف
قطع خفوقي يوم فسخ ثيابه
فسخ وغسل ثم طيب وانا ا شوف
كفن ودمعي مثل وبل السحابه
عقب العصر شلناه للعود منسوف
على النعش مايوحي اللي حكابه
ونزل بقبره بين الاعضاد ملفوف
ومدد ومن حوله جميع القرابه
حطيت لبنه تحت راسه كمالنوف
وفكيت عن وجهه بيدي حجابه
صفوا عليه من اللبن عدة اصفوف
وخلطت من دمعات عيني ترابه
قاموا يهلون الرمل هل بكفوف
لين اندفن قبره ونصب انصابه
قمت اتعبر والعرب حولي وقوف
حول القبر قلبي تزايد عذابه
ذكرت ابوي اللي مع الناس معروف
بحسن التعامل والوفى واللبابه
امسٍ يكلمني وينطق لي احروف
لمن تكلم خاطري اهتنابه
واليوم فارقني ورافقني الخوف
والقلب للهوجاس انهج بابه
ياليت موتي صار من قبل ماشوف
ليته سطابي وتركه ماسطابه
لاشك هذا الموت والموت معروف
لجاء يسل الروح محدٍ درابه