2009- 10- 25
|
 |
راعي التسعات
|
|
|
|
|
لا تغيبي
علّمي وجه الزمن معنى الذهول
لاحبستي .. صبعك إبفمّك خجل
دام روحك أرض .. وأنفاسك سيول
من يلوم الورد .. لو فيك أحتفل ؟
الحكي في مبسمك .. طفلٍ كسول
نامت أمّه : يوم شاورها .. الملل
تشرقين يذوب من ضيّك عذول
تغربين .. يفزّ بعيوني الكسل
من برودك .. يشتعل جمر الفضول
في إشتعالك .. ينجلي برد الزعل
يـ أبعد دروب اللقا و آقرب ميول
يـ آول سنين العمر وآخر فصل
لا تغيبي ليل مضنونك .. عجول
وش يهدّي الشوق لو عنّك سأل
فيني من طبع المطر حُب النزول
للبشر .. للرَمل الأسمر .. للأثل
شخص يبذر طيبته .. يبغى تطول
بأرض جردا كل ما فيها انقتل
عادت الأيام .. تفعل .. ماتقول
وعادتك يالريح تطفين الأمل
ما إشتهيت أتبعك .. حشّمت الحمول
مو مشان ألقاك من شاني رَجل
أصعب إمن التضحية غصّة خجول
ضاع بين الصمتّ و قيود الأهل
إيه وينك .. مابقى للصبر زول
ذبلت آمالي ... وغطّاها الرمل
سهله أرحل .. خلفي الضيقه خيول
صعبه أبقى مادرى بي كود .. ظل
|