الليل هوّد وأكهف النجم لغياب *** قضى الحديث وودعونا المسايير
أحدٍ قفل من دون هوجاسه الباب *** وأحدٍ غدت جدران بيته تفاكير
يا ساكن الهوجاس ممساك ماطاب *** راحت مجاهيم وجتنا مغاتير
لا والله الا ظامنا بعد الأحباب *** الشوق ظالم لاتعدى المحاذير
أحبابنا اللي عقبهم كننا أجناب *** لو ماجفتنا الدار دار المناعير
ليت الثلاثاء ماكتب يوم في كتاب *** من غبت ياجبر القلوب المكاسير
كل ما ذكرته قمت للوصل طلاّب *** وقلت القطاعة في هل الرحم تقصير
وين أنت ياغيثن من الجود صبّاب *** يمينك أقرب من سحابن مزابير
وين أنت يا معتق من الحاجة رقاب *** ايظا وبك حكمة ولطفن وتقدير
قالوا مريض وقلت شفاي لاطاب *** قالوا بعيد وقلت حنا المعاتير
والله لوتطوى له بحور وهضاب *** ماهو جزاءً له مير للشوق تصبير
أنا أشهد ان الحب تكتب له أسباب *** وما كل قاعن فيه تنبت نواوير
يا شيخنا تكفيك لو ضحكة الناب *** وشلون وانت ماتحسب المخاسير