السلام عليكم ورحمة الله وبركاته

أخوي أنيس النفوس..أنا اليوم جبت لك حلم..حلمت فيه قبل يومين..بس توقعت إن يكون أضغاث أحلام وعلشان كذا مافكرت أكتبه..


لكن بما إنك تستانس على النكت إللي يرسلها لي ابليس..فقررت إني أكتب أي حلم أشوفه..مهما كان سخيف <<< ماتنعطى وجه أبد

وقلت حق نفسي : يامكافحة الحشرات إذا ماكان الحلم رؤيا صالحه..فأكيد راح يكون نكته طريفة..

المهم..الحلم هو /

شفت نفسي وكأني داخله غرفتي وسكرت الباب وراي..وتوني بجلس على الكرسي..إلا وأشوف
باب غرفتي انفتح بقوه ودخلت حرمة لابسه أسود في أسود وحتى وجهها مغطيته..وطبعاً الحرمة هذي هيئتها كأنها هيئة وحده من زوجات أخواني..لكن أنا يا أخوي أنيس كنت أعتقد في الحلم إنها من الجن..

المهم..الحرمة فتحت باب غرفتي بقوه ودخلت وهي متجهه لي وكأنها تبي تهجم علي..وطبعاً أنا في هالحاله حيل خفت واحترت وش أسوي..بس قبل ماتوصل عندي..قلت : بسم الله..بسم الله..

وبعد ماقلت هالكلمة يا أخوي أنيس صارت الحرمة تحاول توصل لي بس مو قادرة..

ومع تكراري لقول: ( بسم الله بسم الله )....ليش يا أخوي أنيس ماينقلب السحر على الساحر...
وأصير أنا إللي ألحق الجنية..وهي إللي تنحاش مني..هههههه

وبيني وبينك..أنا عجبتني الشغله..واستمريت وأنا أقول: بسم الله بسم الله ...وهي تنحاش..وأنا وراها <<< تلعب مع الجن صياده (صييده)

طبعاً الشي المهم في الحلم..إن كان عندي هدفين من المشي وراها ..
الأول / كنت أبي أطلعها من البيت كله..مو بس من غرفتي
الثاني / كنت أبي أعرف وش يصير فيها إذا كثرت تكرار (بسم الله) <<< قاعده في معمل تجارب

المهم..هي طلعت من غرفتي..وطلعت من الصالة..وصعدت الدرج وكأنها بتروح حق شقق أخواني..
وأنا طبعاً في هالوقت كنت واقفه لها عند بداية الدرج وأقول (بسم الله بسم الله) <<< ههههه مايسوى عليها هالجنية..تلقاها داخله غرفتي بالغلط..وتوهقت

المهم..وهي تمشي على الدرج..نزلت زوجة أخوي (إللي الجنية تشبهها) <<< هههه اتخيل لو زوجة أخوي تشوف إللي كتبته..

وطبعاً الجنية أول ماشافت زوجة أخوي..طاحت على الدرج..واشوي اشوي اختفت..

وبعدها..صحيت أنا من النوم..ومن الخوف تسمرت في مكاني ومو قادره أرفع يدي وأشغل الأباجوره..


____________________انتهى