الليل يسري بين هم وكلايف
والصبح يطلع والشقا فيه مخلوف
أعيش مابين الرجا والحسايف
والوقت له دورات وأيامي تطوف
وتقول لي بالحب وش كنت شايف
الهم.. والحرمان.. والجرح.. والخوف
ماعاد لوجيه الليالي طرايف
سرى النديم وجوني همومي ضيوف
وأنا وحزني والقصايد ولايف
مكنتهم بالعقل والروح والجوف
وقلطتهم وسط الضلوع النحايف
وأكرمتهم بأحلامي سمان وضعوف
وعديت في عالي نبا كل نايف
وجريت من صدري على سيرته أوووف
وبيّحت سدّي والمدامع ذرايف
وكتبت من دمعي على أوراقي حروف
((أول لقانا بإبتسامة شفايف
وآخر لقانا صدّ.. وأعذار .. وظروف..!))
البعد واقع وأصبح الوصل زايف
وصرت الغريب وهاجس الليل معروف
ماقلت لك: قلبي من الحب عايف
وتقول لي: جرب معي وأترك الخوف
شف غيرها ..والا أترك القلب خايف
الوضع قدامك عن الحال مكشوف