[يا مرحبا يا أم الدلـع والتمغنـاج
يا مرحبا يـا أم الحـلا والترافـه
فيك الجمال اللي بلا صبغ مكيـاج
شي ٍ طبيعـي مابـه أيـة كلافـه
يا أم الجديل ودجّة الليـل مـدلاج
وإلا العيون و بحرهـا والمسافـه
لبيه يا لون الحيـا حُمـر الأوداج
شي ٍ يشوف القلب والقلـب شافـه
في طلّتك وجه الضحى نور وهّاج
في بسمتك ذاب العسـل بالكنافـه
تفرك على الكفين من زود الإحراج
تفرك على قلبي حنـان و لطافـه
يا نور لحظات اللقا عنـد محتـاج
شخص ٍ يشوفك حلم وإلا خرافـه
لا مرّني طاريك في فلّـة حجـاج
هبّت على قلبي هبـوب إرتجافـه
أفزّ لك فزّه كمـا الطيـر هـدّاج
وآقول شعـر ٍ ميزتـه بإختلافـه
كم لي أشوف النهر من دونه سياج
وآنا على حدّ الظما فـي ضفافـه
لو قلت وصلك يعتبر صرفة علاج
بقول صـدّك يعتبـر شـر ّ آفـه
لا تصدّقي في شاعرك كل هـرّاج
هذي علوم أهل الردى والسخافـه
والله .. يمين الله .. ولا عاد يحتاج
أحلف .. وقلبي لك يقول إعترافـه
إنك بعيني غير .. يا زين الأدعاج
من لا عشق شرواك .. وإلا حسافه
مرحبا للجميع هذي القصيده للشاعر محمد بن حسان
عنده قصائد مرره حلوه انا صراحه من المعجبين في قصائده