سبحان الله العظيم حنا يا الشعب السعودي دائما نبي الشي الجاهز اللي بدون
تعب وبدون أي مجهود . والى الان ماني قادر افهم وش مفهوم بعض الاخوان والاخوات
عن الدراسة الجامعية ؟ او وش اللي يتوقعونه في الدراسة الجامعية ؟ وشو الهدف
اللي يسعى له الواحد ويبغى يحققه من دراسته الجامعية ؟
من الله خلقنا واحنا ندور بس اللي يعدينا أي اختبار من الابتدائى الى الجامعة
وعشان كذا للاسف تركيبة مجتمعنا غريبة جداً ماعمري شفت زيها في العالم كله .
وربي استغرب اللي لازالوا مصرين ان الاختبار صعب وجالسين ينتقدون الدكتور
وزعلانين وما ادري وشو . والمصيبة ان كل الموجودين ما اتوقع صغار سن او مراهقين
مرحلة متوسطة ..
الحين بالله اختبار 80% من اسئلته من اختبارات الفصول السابقة وباقي الاسئلة
ما ابتعدت عنها كثير , وش تبون اكثر من كذا ؟
المادة وربي من افضل المواد للتفنن في الاسئلة لان معلوماتها كثير ومشربكة . والله
لو كان الدكتور فعلاً يبغى يصعبها او يعقدها ان يحط اسئلة عمر اهلنا ماحليناها لو
نحفر شهر .
الحين بالله طالب او طالبه في مستوى جامعي مايبغى يتعب راسه شوي ويفكر
ويكتشف ان المغلق نسبياً = المفتوح نسبياً ؟؟؟؟؟؟؟؟؟؟؟
افسرها بشكل اخر : اذا قلنا شباك مفتوح منه شوي , مانقدر نقول ان نفس الشباك
مغلق منه شوي ؟؟؟؟؟؟
ياناس خافوا الله في انفسكم واصدقوا مع انفسكم واتعبوا على حالكم شوي .
لاتنتظرون كل شي يجيكم نسخ لصق .
عموما الاختبارات وانتهت الحمد لله على خير . لكن نصيحه للسنوات الجايه
اتعبوا على انفسكم شوي ياناس وتراها لصالحكم .
الله يوفق الجميع والف شكر للدكتور خالد .
تحياتي للجميع