--------------------------------------------------------------------------------
السلام عليكم ورحمة الله وبركاته
بعض الناس يمشي على الأرض وكنه يمشي على كبدك , هياط وتعامل بفوقية وأنا ولد الشيخ زعطان وأن من القبيله اللي سوت وعلمت وأنا من العائلة الفلانية اللي حاربت ومادري ايش !! وأنا من جدة اهل العلم وانتم من الشرق المتخلفين والثاني يقول انا من الرياض واللي يقول من الجنوب واللي يقول من الشمال والشرقية وكل جهة !!
يجي ولد زعطان يلبس ثوب وحركات وجوال وسيارة كشخة وكل الدعوة من راسه لين رجوله أقساط x أقساط , وكلها عشان أمور كمالية , والثاني مثله والثالث وهلما جرا .. وبالأخير لو يبغى يشتري خبز لبيته وعياله مايلقى ريال واحد ويروح يتسلف من فلان وعلان ...
صارت زواجاتنا نصب وتخلف على حساب أساسيات , يضرب الدين عليه وعلى أبوه اللي خلفه عشان بس يقولون والله عرس فلان كان شيييييييييييييي .. ويجلس لين يدخل ولده المتوسط وهو يسدد في هالديون اللي لايرضاها الله ولارسوله .. بس عشان ( الهياط ) ..
حتى تعاملنا مع الناس صار هياط , صار الواحد لازم يثقل نبرة الصوت ويشد ظهره وياطويل العمر والله يسلمك وربي يحييك , وتاليها مثل أولها طلع اللي يتكلم مابيده لا حل ولاربط .. بس عشان ( الهياط ) ..
أنا ودي اعرف ليش الانسان يحرم نفسه أجمل حاجة بالكون وهي التعامل مع الناس زي ماخلقه الله , ببساطة , وسعة صدر , ليش إحنا نتعامل بطريقة تخرجنا عن ذلك المخلوق الجميل ( الإنسان ) ...
كلامي هذا للجميع للشباب والبنات , خلو حياتكم بسيطة , حيوية , اشراقه , مليئة بالحب , صدقني اللي بيستفيد بالاول والأخير هو ( أنت ) بيعود هذا عليك بالصحة والبعد عن الضغوطات النفسية وغيرها ...
والله من محبتي لكل الناس أقول هالكلام
وربي يسعدكم دنيا وآخره