سمعت كثير من الطلاب يتكلم عن الشعيبي و محادثته مع الشعيبي .. يا ليت واحد منكم أيها الزملاء الكرام الي عنده رقم الشعيب و في نفس الوقت عنده واتساب ينقل رابط هذا الموضوع للدكتور الشعيب و يبلغه تحياتي ..
كلام الأخ الشعيبي المكرر و الذي يعيده في اليوم أكثر من عشر مرات ، و يقوله لكل طالب يتحادث معه هو نفس الكلام لا يتغير .. يعني الشعيبي صار حافظ الكلام وبمجرد ما يتكلم معاه طالب من الجامعة يصير يرد عليه بشكل أوتوماتيكي ...
أنا رح أسمع لكم كلام الشعيبي الي ما عنده غيره :
الجامعة تبذل قصارى جهدها لتجهيز المراكز .. ألا تعلم أن عدد المراكز 132 مركز ، وأن عدد الطلاب حوالي 60 ألف طالب .. و أن التجهيز يحتاج إلى جهود جبارة و التصحيح يحتاج إلى وقت طويل و تجميع الأوراق من المراكز يحتاج إلى وقت .. و الجامعة تفعل و تبذل و تخصص و تهيئ و ... الخ الخ الخ
ينتهي كلام الشعيبي بعد ساعة من التمجيد و المدح والثناء في الجامعة و عدم تقبل أي نقد من أي طالب .. بالعكس الأخ يزعل إذا أحد انتقد الجامعة و كأنه شرط على الطالب أن يمجد و يمدح و يشكر في الجامعة و لا يذكر عيوبها مطلقًا ..
طيب تعالوا يا زملائي الأعزاء وخلونا نشوف الشعيب الي يزعل من كلام الطلاب و كل شوي يعيد الجهود الي يبذلها في الجامعة ، هل هي جهود مجانية أم مدفوعة الثمن .. تعالوا نحسب ونشوف ..
طبعًا عدد الطلاب 60 ألف طالب
معدل دفع الطالب للترم 2500 ريال
مجموع الدخل في الترم الواحد بعد ضرب 60 ألف في 2500 ريال يساوي 150 مليون ريال !!
يا جماعة الخير الطلاب يدفعون للجامعة في الترم الواحد 150 مليون ريال والشعيب مزعجنا بالجهود الي يبذلها .. وفي النهاية إحنا آخر جامعة تطلع نتائجها .. و لا عندنا ترم صيفي .. و صاروا الدكاترة في الجامعة يحاولون يصعبون الأسئلة ويستقعدون للطلاب .. و صارت الجامعة تسكر البلاك بورد من دون حتى ما ترسل رسالة للطلاب علشان يوفرون حق الرسائل علشان ما تخلص عليهم المية وخمسين مليون !!
يا أستاذ أحمد الله يرحم والديك أنت و موظفين الجامعة هذه الأعذار ما تليق بكم ولا تليق بالجامعة ... كل ما تحدث إليكم طالب حسستوه انه جاي يشحذكم !!
الطالب دافع فلوس ويبغى خدمة .. و الطالب في الآخر زبون يدفع نظير دراسته .. و من حقه يلاقي خدمة جيدة و لباقة في التعامل ..
أنت لو تروح و تدفع فلوس للخطوط السعودية و يجلسونك على كرسي مكسور ، و يأخرون رحلتك عشر ساعات .. تخيل و أنت قاعد تشتكي عندهم يردون عليك بنفس أسلوبك مع الطلاب ويقولون لك :
أنت ما تدري عن حجم المعاناة الي تبذلها الخطوط السعودية في تجهيز الرحلات .. و بعدين يا أخي الكراسي عددها كبير في الطائرات وما نقدر نشيك على كل كرسي ونشوف مكسور ولا لا .. وغير كذا تأخير الرحلة عادي يصير و الطيار كان نايم ما فيها شي الناس كلها تنام .. و بعدين احمد ربك ياخي انك راكب معانا في الخطوط و معطينك كرسي ..
بالله وش هي ردة فعلك ؟!
أنت يا أخي تعامل الطلاب بنفس هذا الأسلوب الي ما ترضاه على نفسك .. و تكرر نفس الكلام الي تكرره لكل طالب عن قوة الجامعة و جهد الجامعة و اجتهاد الجامعة ، وكأنك تمنّ عليهم الخدمة الي تقدمها لهم بفلوسهم ..
وأخيرًا نرجوا منكم مراجعة أسلوب تعاملكم مع الطلاب ، و استشعار أن الطالب في النهاية عميل من حقه أن يشتكي ، ومن حقه أن يتساءل عن أسباب التأخير ومن حقه أن يطالب .. وليس سجين تملون عليه أوامركم و تنهرونه و تزجرونه حينما يتحدث ..