:



من مسكت قسم التمهيدي وانا صايره اشوف اشياء تقهر ,,

مو من الاطفال ,, من اهلهم

جات بنت عمرها اربع سنوات حالتها غريبه ما ادري كيف اصنفها ,, يَ عمري تكسر الخاطر

السالفه وما فيها اني دخلت الفصل وقاعده اتعرف على البنات لسى بَ النظر ولا اتكلم معهم ولا شي معاهم معلمه ثانيه ,, انا فقط اناظر

هذي البنت شدت انتباهي ما تتكلم الا بَ تمتمه ,, ولا تناظر الناس ولو زعلت تضرب راسها بَ الجدار

المهم ,, من اليوم الثاني مسكت الفصل هذا

احاول اتكلم مع البنت ما تتكلم ,, تقول كلام غريب مو مفهوم ,, ما تناظرني نظرها يكون مو محدد تناظر اشياء ثانيه ومن غير تركيز بعد

اعطي البنات اوراق ويلونون ويلعبون ,, هي بس تشخبط مع انها تحب تلون وتحب يكون عندها قلم وورقه واقلام

بس ايششششش ,, طلعت البنت الكترونيه درجه اولى ,,

اشغل اللاب ,, خلاص تتسمر عنده ,, ما تتحرك وتناظر فيه : انا لاحظت انها ركزت النظر بَ شي واحد للمره الاولى من استلمت فصلهم تركز بَ نظرها لشيء

يوم شفتها ركزت على اللاب قلت : ممكن من خلاله تتعلم الكتابه او حتى النطق

شغلت لها فيديو لحرف الباء ,, الا البنت قامت تردد با با با

انا اناظظظظظظظظظر يآربي ماني مصصصدقه فرحت

وأأشر للمعلمه الثانيه ,, اقول شوفي شوفي نطقت

وصيت الاستقبال انو لو جات ام الطالبه هذي خلوني اشوفها ضروري ,, المهم ويجي نهاية الدوام وتجي ام البنت ,,

جيت سلمت عليها وشرحت لها حالة بنتها واني احس ان فيها شي مو طبيعي نوع من عدم التركيز في نفس الوقت عنف مع الاطفال اللي معاها ,, وغير كذا تأذي نفسها وتضرب بَ راسها بّ الجدار ولا تتكلم ,,

طبعاً امها يَ قلبي اميه لا تقرأ ولا تكتب ,, مع ان عمرها 30 سنه

قالت : هالبنت اللي تشوفينها تنضرب من اخوها وابوها ,, ولا نخالط الناس ولا نطلع ولا نروح ولا نجي ,, عشان كذا ما تعرف تتكلم

قلت : طيب يَ خاله معقول انتم بَ البيت ما تتكلمون معاها ولا شي ,,

قالت : حنا نبي الفكه من شرها بس نحطها عند التلفزيون ,, > عشان كذا صارت البنت الكترونيه ما تفهم للكلام المباشر ولا تركز بَ النظر للناس ,,

قلت طيب يَ خاله والحل ,, هذي ما يبي لها مركز عادي مثلنا ,, يبي لها وحده تخصصها صعوبات تعلم

قالت : انا ما يهمني ,, اهم شي ما يجي شهر 10 الا وهي تكتب وتقرا ووتتكلم

قلت : لازم تساعديني هذا مو دوري لحالي المسؤوليه مو علي بس

انا اعلم قراءه وكتابه ,, واذكار وقرآن ومبادئ بسيطه للأطفال ,, ما اعلمهم الكلام والنطق من اول وجديد

ما اهتمت بَ الامور الثانيه ,, اهم شي عندها ان بنتها تقرا وتكتب تقول ما ابيها تصير مثلي

طيب والعنف اللي تتعرض له البنت في البيت بعد انا اللي احله ,,!!

المسكينه البنت تعودت علي وانا ومعلمتها الثانيه اللي دايم ماسكين فصلهم ,, مره كان عندنا اجتماع ومسكتهم معلمه ثانيه ,,

لما دخلت الفصل بعد الاجتماع لقيتها ورا الباب تعض اصابعها خايفه من المعلمه الجديده لانها وجه جديد اول مرا يعلمهم

الله يحنن قلوب بعض الاهل على اطفالهم ,,

ارقتني البنت هذي ,, حتى صرت احلم فيها