المشاركة الأصلية كتبت بواسطة سيدة الأسئلهـ

.



عدناا..


ماعندي الكثير عشان أضيفه مقارنة بالانجازات الرائعة للأعضاء ..لأني أرى نفسي مازلت في بداية مشواري

ممم تخرجت من الثانوي بنسبة مرضية ولله الحمد وماهتميت للقدرات والتحصيلي

لأني كنت موعودة ادرس برا مع خواتي و كنت متحمممسة وانتظر متى اتخرج بس

وبالفعل سافرت ودرست بمعهد انجلش كم شهر ويوم جينا اجازة شاءت الأقدار أن خواتي الخونة تركوني وأعرسوا

وأبوي ماسمح لي أروح بلحالي وتحطمت شر تحطيم


قلت بابنت وش بتسوين فاتك التسجيل بالجامعات يوم رحتي برا ودرجتك القدرات والتحصيلي مو ذاك الزود والحل؟؟؟

قعدت كم شهر لاشغلة ولا مشغلة لين طحت على اعلان التسجيل بجامعة فيصل وسجلت بس كذا ولا ماكان عندي أي رغبة أدرس انتساب

يعني ماكنت مهتمة للموضوع واصلا نسيته بالمرة لين وصلتني رسالة تذكرني اني انقبلت وكذا

وسددت وارسلت ارواقي وشهادتي بتشجيع من أمي

وهذا انا وصلت للمستوى الرابع .. مير اني ماحبيت التعليم عن بعد ولا ناسبني

واتخذت قرار هالسنة إني أعيد اختبار القدرات والتحصيلي عشان اسجل انتظام لان هو اللي منزل نسبتي

وفعلا اختبرت القدرات ونقزت من 75 % إلى 85 % وتعتبر بمقاييس مركز قياس عالية جدا

الحمدلله باقي درجة التحصيلي بتطلع هالأسبوع بس انا ضامنتها ان شاء الله وبسجل بالجامعات الأسبوع القادم

ودي بتخصص علوم طبية وليس الطب >> فيه فرق

لاني أحب المختبرات والصيدلة وهالأمور بعكس الطب اللي فيه جراحة

ولو مانقبلت ارجع لحبي الأولي المحاسبة

^

أكيد بتقولون والتعليم عن بعد وش مصيره

تشاورت مع أهلي وقررت أكمل فيه هو بعد >> مو طماعة أبد

واثقة بمقدرتي على مزج التخصيين إن شاء الله وأصلا مابيتغير شي ..

لأني من الأساس الحين ماأذاكر إلا بوقت الاختبار فماراح يتعارض هالشي مع تخصصي الثاني

وماحبيت إني أقعد طول الترم من دون شي مفيد ... غير كذا شهادتين بست سنوات أحسن من شهادة وحدة بأربع سنوات :58545:



ممممم وش بعد .. بخصوص الهوايات الأخرى إلى الآن مابرعت بشي معين

لكن عندي من كل بستان زهرة .. يعني مثلا الشعر الفصيح .. أحبه وعندي محاولات أكتبها بين فترة وفترة

أقدر أعرف اذا البيت فيه كسر ولا صحيح ماقد درست ولا قريت هالشي بس كذا طلعت معي

احب أكتب قصص وبديت بالكتابة من الابتدائي وعندي ملف كامل مليان قصص وكتبت روايتين ونص رواية

كلهم مخبيتهم من زمان و لا يمكن أوريها لأحد لو على جثتي

مع ذلك للأسف مستواي بالكتابة ثابت مايتطور لأني ماأقرا ولا أحب اقرا حاولت كثير بس أحس بصداع بكل مرة أحاول أقرا فيها كتاب

أتمنى أحترف القراءة العميقة لأنها فن بحد ذاتها وبوابة لزيادة الثقافة والاطلاع

أعشق الانجلش وعشت أجمل الأيام بدراسته برا ولو كملت كم شهر زيادة كان اتقنت اللغة

بس الحمدلله على كل حال ..


هذا اللي عندي .. وسوري لأني ماأضفت شي يستاهل بس قلت لكم توني ببداية مشواري

بس يكفي إني استفدت من خبراتكم وقصصكم وخاصة الأخ تركي الشعلان

نشرت قصتك بين أهلي و زودت عليها شوية بهارات من عندي لزيادة الأكشن والحماس

اتمنى تسامحني وتحللني

ولايهمونك الحساد اللي حولك أبوي كان مثلك زمان كان فيه قروب بالعمل مأذينه بشكل كبير

بس صبر ونال بالأخير .. الله يكون بعونك ويوفقك يارب ومن أعلى إلى أعلى إن شاء الله ..

لي عودات أخرى لهالموضوع الشيق وشكراً بحجم السماء لمبدعنا طموح لاينكسر الغني عن التعريف

.