ملتقى طلاب وطالبات جامعة الملك فيصل,جامعة الدمام - عرض مشاركة واحدة - ( المطبخ الرمضاني) .. موضوع خاص بالحريم والبنات بس ! ( الحلقة الأولى )

بحااااار · #1 2012- 7- 24

حيّالله الغالين كلّهم .. وكل عام وانتم بخير وصحّه وعافيه

أخباركم .. وأخبار رمضان معكم .. ؟
الله يتقبّل من الجميع !

عدّة نقاط أحب أبينها على غِرار هالموضوع المتفركش ... !

أولاً : هالموضوع خاص بالحريم والبنات فقط .. يعني أي شنب أو تمساح يدخل .. يحاول يشرفنا آلحين بطلوعه مع الباب .. لأن " الطبخ والنفخ " مهوب له .. التمساح والشنب حدّه موتر يزبرقه ويلمّع كفراته ليل ونهار ... أنا داري أن كلامي هذا آلحين قاعد يقراه " شاب " يبي يشوف وش ورى بحـــااار ومطبخه الزهري .. بس أنا أكرر له مره ثانيه وأقول ( يا أخ .. يا أنت ... يابو ... أطلع الله لايهينك .. رح أمسك لك مصحف واقرا لك كم آيه أبرك لك .. مالك ومال " البرياني " و " السمك المحشي بالخلطه " .. شرّفنا برّا ياحلو ) !

سادساً : الموضوع " هاد " يصلح لجميع فئات الحريم .. بنات .. عزبات .. متزوّجات .. عانسات ... مُطلّقات .. حتى الحافزات << الي ينزلهم حافز .. من باب الفرح بجهودهم في المطبخ !

رابعاً : أنصح أختي اللي تبي تطبخ أنها تستغل وقتها " وتشتري " لها مسجّل أبو سماعات كبار ( كبر أذاني واحد من العيال ) تشتريه لها وتركزه في المطبخ وتشغّل المسجّل على محاضرة حلوه ومفيدة .. وتجمع مابين الفائدة .. وفي نفس الوقت " تحرق طبختها " !

أختي الكريمه .. يالله آلحين شديّ حيلك .. أدخلي المطبخ .. جمّعي أغراضك .. سكاكين .. ملاعق .. قدور .. صياني .. شغّلي الفرن .. شغّلي الهواية عشان ماتنكتمين .. أستعيني بالله ..

اليوم طبختنا بتكون من الأطباق الرئيسيه ..

يعني طبخة دسمه وماتُخرّش " الميّه " ..

اليوم بتكون الطبخه عباره عن ( مكرونه بقشطة الخفق )

المقادير /

علبة مكرونه + علبة ذره + قشطة الخفق + 3 حبّــــــات جزر مبشور+ كيس جبن موزريلا + 3 ملاعق زيت زيتون + دجاج مقطع مكعبات صغيره + بصل مفروم + ملح ( على كيفكم مهوب إجباري ) .

طريق تصيلح الطبخه المتفركشه تفركش أنما إيه /

أوّل شي نسلق المكرونه مضبوط ، ثم نحط عليها زيت الزيتون ، نخليّها شوي .. ثم نحط البصل والدجاج .. وتقعدين تقلبين فيه شوي وتحركين بهدوء ( أركدي يابنت .. شوي شوي عشان تطلع الطبخه مضبوطه ) .. ثم تحطين بعدها الذُره والجزر والملح .. وتتركينها لين تشوفينها بدت تنضج وتزين .. بعدها تحطين خليط الدجاج على المكرونه وتضيفين عليها قشطة الخفق .. وتخلطينها مضبوط .. وتحطينها في صينية وترشين فوقها " جبنة الموزريلا " .. ثم تدخّلينها في الفرن لين تذوووووب الجبنه ..

ثم عاد تطلّعين الطبخه من الفرن .. وتقدمينها للاهل أو الزوج أو العيال أو الزميلات والصديقات .. أو تبيعينها كطبق خيري في دار تحفيظ .. ولاتنسين النص بالنص !

اليوم طبختنا كانت رئيسية والحلقه الثانيه بتكون صنف " حلى " .. والحلقه الأخيره بتكون صنف " عصير ومشروب بارد " ..

أجل أذكر أختي راعية الطبخ أنه تحتسب الأجر عند الله في طبخها .. لأنها تقوم على شؤون الغير وتؤدي خِدمه جليله مُباركه ...

بالنسبة لاخواننا التماسيح والشنبات بشتى أشكالهم وأصنافهم ومؤهلاتهم " الجامعيه " .. تراي مانسيتكم .. بيجي اليوم اللي أعلّمكم وش لون تطبخون في البر .. من أوّل طبخه لآخر طبخه .. بس فكوّني من شرّكم وخلوني أكتب مواضيع هالشبّاصات الزهريه اللي يزدهر سوقهم في رمضان وترتفع نسبة الطلب عليهم :58545: !

أسعد الله مسائكم وصباحكم .. وبالهنا والشفا .. وجعلكم ماتغصّون

أخوكم الشيف " بح بح "