|
رد: [ تم تعديل العنوان ] محتاره بين قسم الرعايه التنفسيه و المختبرات الطبيه
العلاج التنفسي .. مجال جميل .. و لطيف .. و مهم جدا ..
في حالات يمر فيها المريض لها اولوية انها تتصلح في حالة انها توقفت .. يعني انها تهدد حياة الانسان
يسموها life threatening situations
هذي الحالات اللي تعتبر حالات طارئة ..
منها التنفس
فاحنا اخصائيين العلاج التنفسي يحتاجونا في مثل عالحالات
وظيفتنا انا نستخدم الالات و الادوات المتوفرة عشان نتنفس الى المريض كونه غايب عن الوعي و ما يقدر يتحكم في روحه
و طبعا هذا معناته ان احنا وجودنا في قسم الامرجنسي ( الطوارئ ) مهم وايد
الشي الثاني
ان الواحد اذا انقطع تنفسه لاي سبب من الاسباب
او عنده اساسا مرض يسبب ضيق في التنفس او اشياء من هالقبيل .. هذا يسبب حالة من الخوف و الاضطراب عند المريض
فاحنا اخصائيين العلاج التنفسي وظيفتنا انا نهدي المريض و نعطيه علاجه او ادوينه .. و الاهم من هذا كله انا نشرح للمريض و نوضح له كل شي عن حالته و عن كيفية اخذ الدواء
فاحنا وظيفتنا فيها شرح وايد .. و نعطي تعليمات وايد
فلازم انتين تكون عندش الجرأة انش تتكلمي مع المريض او اهله و تكوني صبورة في التعامل معاهم لان لازم تعطي المعلومات بالشكل الصحيح و بالتفاصيل
الممرضات و الدكاترة يعتمدوا علينا احنا في اعطاء هذي التعليمات لان احنا اللي متخصصين فيها اكثر شي
الشي الثالث
احنا شغلتنا مو زي التمريض
يعني الممرضات يفهموا في كذا ناحية .. لانهم هم المسؤولين عن المريض من الى
لكن احنا وظيفتنا فقط الاهتمام بالتنفس
صحيح احنا نسحب دم للمريض احيانا
لكن مو لغرض الفحص العام زي ما يسووا الممرضات
الشي الرابع
الامر الايجابي في العلاج التنفسي انه ما فيه تعامل مع امور مقرفة داك الزود .. مثل البول و انتي بكرامة و الا تنظيف عملات ههههه
لكن اللي بتشوفيه ٢٤ ساعة في هالوظيفة او البلغم و المخاخيط ههههه
هذا هو الشي الوحيد اللي بتتضظري تتعاملي معاه
يمكن في البداية بتنقفري وايد
لكن مع الوقت بتتعودي و بتحسي ان التعامل مع هذي الامور يسوى وايد اذا كنتي انتي تنظري الى العمل اللي تسويه انه انقاذ حياة انسان
و طيعا في المجالات الطبية .. حتى الامور اليومية الصغيرة اللي تسويها و اللي حتى يمكن ما ليها علاقة في تخصصش
مثل انش مثلا تغطي المريض اذا طلب متش
او تجيبي له كاس ماي
او تنكتي وياه عشان تخليه يغير جو
هذي كلها ترى لها معنى و لها تأثير ايجابي عليش انتين و على المريض نفسه
الشي الخامس
طبعا في امراض كثيرة ينولد بها الانسان
او تحصل له حتى بعدين
تأثر على تنفسه
يعني مو بس حالات طوارئ
احنا أهدافنا الرئيسية هي كالتالي :
١- ان المريض يكون يتنفس
٢- نسبة الاكسجين في الدم تكون متاسبة
٣- يكون في تبادل غازات بالشكل المطلوب
٤- الرئة تكون نظيفة من البلغم و كل مجاري الهواء تكون مفتوحة
٥- ان الرئة تنتفخ و تتسكر بالمستوى المطلوب
اذا كان في تدهور في حاجة من هالحاجات .. احنا المفروض نكون نعرف كيف نتعامل معاهم
الشي السادس
اكثر قسم في المستشفى لازم نتواجد فيه هو العناية المركزة
في عالقسم .. يجونا المرضى اللي عندهم حالات شديدة تتطلب ان الجهاز هو اللي يتنفس اليهم
حتى و لو كانت الاصابة مو تنفسية بشكل اساسي
اني اعطيش مثال
مثلا واحد صار عليه حادث سيارة الله يكفي الشر و جته اصابه في راسه مثلا
الراس ماله شغل بالتنفس صح و الا لا ؟
لكن ممكن ان الضرية هذي .. اثرت على المنطقة المسؤولة عن التنفس في الدماغ
فنتيجة هذا الشي ان الشخص الحين ما يقدر يتنفس لان ما تجيه اوامر من الدماغ انه يتنفس
هنا يجوا اخصائيين التنفس .. و يركبوا الاجهزة و يشغلوها للمريض عشان تتنفس اله
بالنسبة للاجهزة .. احنا المفروض نعرف كيف نشغلها .. نطفيها .. نغير فيها في حالات الطوارئ .. و هلما جرى
الشي السابع
في حالة ان المريض يحتاج اشعة مثلا .. و لازم ينقلوه من العناية المركزة الى قسم الاشعة .. احنا اللي ننقل المريض بسريره باجهزته مع الممرضات
يسموه patient transport
هذي تقريبا نبذة مبسطة عن العلاج التنفسي بشكل عام
ممكن بعد تستفيدي من هالروابط اذا تحبي
http://www.youtube.com/watch?v=CgfAurSqZnw
http://www.youtube.com/watch?v=JR7gPhbIs9s&feature=related
|