باطرح وجهة نظري بالنسبة للصيفي:
اولاً:
بالنسبة للدكاترة فأول شي هم موجودين للانتظام ليش ماقالوا عندهم اجازة , ومع ان طلاب الانتظام يحتاجون دكاترة اكثر مننا, واغلب الدكاترة الموجودين لو تقوله تعال لك اوفر تايم ودرس انتساب بيجون ركض, وكل الجامعات عندها دكاترة تدرس في الصيفي, ولو الجامعة تريد فعلاً تخدم الطلاب وتخدم نفسها قبل كذا فكثير من الدكاترة يتمنى يدرس بالصيف وكل شي بحقة...
ثانياً:
وبالنسبة لمراكز الاختبارات فهذا عذر غير مقبول, لان الجامعات والمعاهد ومراكز التدريب كلها شغالة في الصيف وزي الحلاوة , ليه ماقالوا صيانة؟! هذا بزنس كل شي بحقة, انت معطيهم دراهم يعني بيشتغلون في اي وقت ورهن اشارتك..
وانا شخصياً مستعد لو تكلفني الجامعة ادبر لهم اكثر من 40 مركز في مدينة الرياض لوحدها فما بالك بغيرها من المراكز!!
ثالثاً:
وبالنسبة للانظمة فليس من المنطقي أبداً ان تجلس 3 شهور مقفلها بحجة الصيانة, فالمواقع الحكومية ومواقع الخطوط و البنوك والمنتديات وجميع مواقع العالم شغالة اونلاين طول الايام على مدار السنة وصيانتهم يوم واحد خلال سنة كاملة..
ياجامعة يامحترمة ياحبيبة اسمعوووووونا :
الطلاب عندهم همة عالية ومستعدين بكل شي لو نجي للجامعة في الاحساء ونختبر فيها اهم شي صيفي نختصر على الاقل ترم او ترمين تنفعنا بامور كثيييرة ..
ادري ان هناك صعوبات اخرى تواجه الجامعة , وامور اخرى يمكن الجامعة ماتبي تفصح عنها, بس اذا حطينا ايدنا بايدنكم واجتمعنا وذللنا الصعاب سويا حصلنا على النجاح والشهادة وتحصلون انتم على نجاح هذا البرنامج الرائع (التعليم عن بعد) ..
اخوكم: عبدالله