بديت بأسم اللي له الخلق ترجيه...
ربٍ كريمٍ كل خلقه ترجاه
نويت بدع البيت بالفكر أسويه....
ومن كايد القيفان ساسه ومبناه
الله من هم على القلب كاويه....
همٍ بصدري دايم الدوم يصلاه
الهم واجد والهقاوي تداريه...
أرجوك ياربي عسى الهم تجلاه
أسهر مع السهران والليل ممسيه...
ياطول ليلي مع همومي وما أقساه
لانيب ضميان ولا الجو شاكيه...
ولا لي مع العشاق راده ومشهاه
أنا شديد العزم عزمي مبديه...
حسن النوايا فوق والياس مقواه
متحزمٍ قده وقدي مقويه...
مقط على راسي عصابه ملواه
حب المراجل عشق والنفس تبغيه...
يارب ساعدني عل كل مبغاه
أتوق للعليا وللخير أبا أرجيه...
هذي طبايعنا وماهي مباهاه
اللي حفر بالصخر بظفور أياديه...
نحت أنا بالظفر في كايد صفاه
يوم أرتكي للحمل لو ثقل أعديه...
وأعز نفسي عن بقايا رزاياه
حرمان في عهد الطفوله معانيه...
شبابنا عهد الصبا ماعرفناه
أشقتني الدنيا على كل توجيه...
في دورة العيشه شقاوي ونداه
علم المدارس ماعرفته ولا أدريه...
والفصل مارحته ولا الباب جيناه
بالذات أنا علمت نفسي مباديه...
أخذت أطراف علم وقريناه
عصامي بلا فخر للحق معطيه...
درس الحياه أنواع حنا فهمناه
ذكرت همي بأول القول وأثنيه...
الوقت شين والشين عفناه
وقت غيار وكل شي طلع فيه...
تغيروا ناسه وجنسه وممشاه
راحت سلوم الناس والكل ناسيه...
عهد الموده والتصافي فقدناه
خطو الولد أبوه شفقٍ يلاقيه...
يقول ماشفته له أيام ماجاه
أميمته تبكي الولد وين الاقيه...
وليدي ثمر قلبي الا وين بلقاه
مع حرمته قاعد ولا سائل فيه...
والأم ناسيها ترى جاهه ملهاه
والأخو هو وأخوه شحناء وتكريه....
مطامع الدنيا وكل قطع ماه
الأرحام قطعت والطمع صاير فيه...
الا وين بلقي لي رفيقٍ مصافاه
رفقة مصالح كم يعطي وتعطيه...
مع حبة للخشم والراس وجباه
ياشيب عيني من زماني وطاريه...
ويجزا زمان راح وأحلو طرياه
في مامضى تلقى المراجل تباريه...
عز ومعزه صافي الود وهداه
الكل منهم ينثني دون معانيه...
متدين في حشمه الضيف وقراه
خطو الولد من قبل عشرة تلقاه...
في دبرت الوالد أذا أحتاج يلقاه
بياض وجه وعز لك تفتخر فيه...
يفاخر بني جنسه على العز والجاه
والبنت نشميه وكل شيٍ تسويه...
طبع أمها والعود تاخذ سجاياه
وفي حشمه للزوج دايم تراضيه...
وربها وعبادته تطلب رضاه
يا الله ياعالم سري وخافيه...
يامحصي خلقه من أدناه وأقصاه
أنك توجهها على خير وتوجيه...
وستر على عبدك بدنياه وأخراه
وصلاتي على المختار حق أو أديه...
والصحب هم والال من يتبع هداه