عنود الصيد
من خصايص عنــود الصيد كثر الطواري
وعــــــادة الظبي يجفـل لاتحـرك ظلالـه
ما يصيد الجــــــوازي كود بخص وضاري
القنص بـــــــــالركـاده والتسـرع جهالـه
ولايعرف الطــــــرد من لايعرف الصحاري
ماتعرّض سموم ولا تعـــــــرض شمالـه
كــــلّ دربٍ عليه من المخاليـق سـاري
للســــــــوالف رجـال وللشكالـه رجالـه
وانت عشقة حيــــاتي ياغـزال البـراري
أتفاول بوجهك سعـــــد من صـرت فالـه
إنـت والله حبيبـي وإنــــــــت والله داري
إن نظــــــــرة عيونك يـم غيـرك جمالـه
ماانقطع سيل حبك بالمعاليـق جـاري
كـــــنّ قلبـي خلقـه الله لحبـك سبالـه
ليلتي يــــــــــاقمرها غـار منهـا نهـاري
حيث وصل المودّه همســةٍ فـي ليالـه
جعل واهج غرامــك مثل وجدي ونـاري
مير ما اظن في دنيــــا المحبـة عدالـه