|
رد: تصوير للبرق مع شرح الطريقة والإعدادات وبعض النصائح
خلاصة التجربه في تصوير البرق ( للمهتمين )
الكميره المستخدمه كانت Canon EOS 550D
والعدسة العادية 18-55mm ولو كانت وايد انجل كان روعه
الإعدادت
وضعية التصوير على المانول M
سرعة الغالق على blub وهي اللي بعد 30 ثانية ( علشان يكون التحكم بسرعة الغالق حسب ظهور البرق بشكل يدوي )
فتحة العدسة تكون واسعة للسماح بدخول كميه اكبر للضوء يعني f4 اعتقد انها جيده ولو زادت شوي مافيه مشكله
الأيزو كنت مستخدم 100 واظنه كافي لأن سرعة الغالق كانت بطيئه وكان حولنا ديره مثل ماهو واضح في الصور والإضاءه في الديره مأثره على التصوير فتخفيف الايزو احسن من رفعه
الترايبود ضروري جداً وهو اللي اعطى الدقه والتفاصيل في الصوره لأن الغالق كان بطيء ولو كنت شايل الكميره بيدي مستحيل ما تتحرك الكميره منها لأن مدة التصوير كانت طويله شوي
الريموت ( يفضل انه يكون سلكي للتحكم بشكل كامل في فتح الغالق وتسكيره ) الله لايعيد الريموت اللي مهوب سلكي لأنه رافع ضغطي من زمان والحمد لله كرشناه 
صيغة الصور كانت على RAW ( طبعاً غير ضرورية ولو خليتها على jpeg مافيه مشكله ) ولكن حتى استطيع اتحكم في المعالجة من ناحية الألوان وزيادة الحده وغيرها
طريقة التصوير
شغل الكميره وخليها على الترايبود واضبط اعداداتك والريموت في يدك وخل الزوم راجع يعني على 18 حسب عدستي اللي استخدمتها وحاول تبحث عن اي مصدر للضوء( بعيد عنك ) يعني لمبة شارع او سيارة ماره علشان تضبط الفوكس عليها لأن البرق بيكون بعيد.
واذا ضبطته يبي يكون الفوكس عندك نفس بعد البرق عنك ( تقريباً ) والا خليه على الآخر وتابع البرق واضبطه معه
بعد كذا تابع السحابه وشف من وين جهة البرق فيها ثم وجه لها الكميره واضغط الريموت وخله يصور واذا برقت قفل الصوره
بعدها مباشرة وراح تنصدم من شكل البرق في الصوره بيصير روعه
طبعاً اذا فتحت الغالق مثلاً وصار العداد وصل إلى 10 ثواني قفل الغالق وشف الصوره هل فيها ملاحظات لأني يوم خليت الغالق طويل شوي في الموقع الثاني صارت إضاءة الديره مأثره على الصور عندي فصرت افتح الغالق بشكل سريع واقفله بعد خمس ثواني تقريباً
الجوالات لازم تكون مغلقه لأن التصوير تحت البرق خطيره جداً والمعروف ان الجوال يجذب الصواعق ( الله يكفينا شرها )
عند التصوير لاتقعد تتفرج على الصوره اللي لقطتها لأنه في هالوقت يمكن تروح عليك اكثر من لقطه مميزه صور وخليك مستمر في التصوير لا تنتهي هالصوره والا وخل الثانية بعدها مباشرة وخاصة اذا كنت متأكد أن الفوكس مضبوط
ماله داعي تناظر الصور .
اللي عنده استفسار او نقطه ما وضحت له ترى المجال مفتوح
وسلامتكم 
|