عزيزتي وله الكون
ماضايقني مرورج بل على العكس أسعدني وشي يفرحني إنكم اهتميتوا لموضوعي
ثانيًا: آنه المسألة عندي كلش مالها علاقة بحلال لهم وحرام علينا.. آنه حبّيت ولمّا فاتحته بالموضوع عصّب مع انّه قاعد يسوّي مثل ما آنه أسوّي.
ثالثُا: آنه حبيبي قبل لايصير حبيبي كان زميلي.. حبّي له ماجاء فجأة ولا من فراغ، آنه شفته بأكثر من موقف واختبرت أخلاقه شخصيته وبناءً على جذي حبّيته.. لأني سوالف الحب من أول نظرة أو من التلفون أو النت هذي كلها ماأعترف فيها...
رابعًا: آنه تربّيت في بيئة ثقافتها شبه أجنبية -- يعني متحررة شوي-- وعندنا في بيتنا خصوصًا وفي العائلة عمومًا لافرق بين الولد والبنت.. كلهم لهم حقوق وعليهم واجبات.. وإذا يصير الولد يحب ويعشق.. البنت بعد من حقها الطبيعي.. خصوصًا انّ العاطفة شي طبيعي وموجود داخل كل بنت.. عائلتنا ماتتدخل في مسألة تحب والا لا.. هم فقط يرشدوننا.. فلان يناسبك وإلا علاّن مايصلح لك..
وتقبلي تحياتي وآسفة ع الإطالة...
********************
أخي جامعي..
آنه لمّا قلت هالكلمة قلتها بس حق أسكّت أخوي.. لأنه كان خايف ان الولد يطلع كذّاب.. مثل ماقلت لك.. حبي له لم ينتج عن فراغ.. وإنّما نتيجة اختبار له ولمدى أخلاقه والتزامه وتمسّكه بدينه أولا ودراسته ثانيًا.. وحبي ثالثًا..
وآنه أبدًا ماني زعلانة ان تزتيبي الثالث لأنه يدرس علشان يشتغل ويتزوجني ويوفّر لي حياة كريمة وجذي أكون - واقعًا- ترتيبي الثاني في حياته وهذا شيء جيد..
وآنه تطمن عليّ.. قلبي ماأسلمه لواحد مايستاهله.. ولو ماكنت واثقه انّه راح يصونه وويحافظ عليه ماكنت سلّمته له بيديني..
آنه لمّا حبيت.. ماحبّيت واحد والسلام.. حبّيت واحد يتناسب مع مؤهّلي الدراسي.. أفكاره مثل أفكاري.. ومستواه الاجتماعي مثل مستواي الاجتماعي
يعني باختصار ماأتوقع ألاقي إنسان أصلح لي منّه..
كأن وااايد طلعنا برّا الموضوع ولازم نرجع له...
بيت القصيد: أخوي يدري بكل شي عن حبيبي وعن مدى علاقتي فيه، ويدري عن حبيبي ملتزم أكثر منه.. فليش مو متقبّل فكرة إنّ أخته تحب؟
بمعنى أصح: هل هي ثقافة مجتمع أم أهواء فرد؟؟
وهل في ممارسة أخته حقّها في الحب يعتبر تعدّيًا على حقوقه الذكورية التي أعطاها له المجتمع وحرم أخته منها؟؟
أتمنى ألاقي أجوبة لأسئلتي.. لأن هذا موضوع بحثي النهائي ولازم أجمع أجوبة منطقية وشافية علشان آخذ الدرجة الكاملة كما إنّ هذا الموضوع بعيدًا عن الدراسة يشغل بالي ليل نهار وأحس إنّي شوي وأشقق ثيابي من الحيرة
أرجووكم ساعدوني ولكم جزيل الشكر