كما تعلمون يوم الخميس الجو كان اكثر من رااااااائع 
والمخيمات حان وقتها ونسيت ادارة الاعمال وقلبتها ادارة مخيمات
تمنيت ان فيه ماده عن الكشتات كان اضمن فيها a+ ولكن رجعت
بالليل
وشفت المذكرات والملخصات والاوراق قلت والله ما مع الإختبارات
راحة
انمسحت الخيمه والمشب من راسي الى اجل غير مسمى
ولكن الي يريحنا ان الرمل الي عندنا والطعوس ماراح تتغير
والله من شين الطبيعه ما فيه شي معنا بالطلعة الا ودخله الرمل
نفضت ملابسي بالحوش اضطر العامل انه يغسل الحوش بالهوز
والسيارة خليت عمال العمارة الي جنب البيت يكنسون الرمل
ويستخدموه في التلييس
كلموا قلابي الرمل حقهم وقالوا له لاتجيب رمل اليوم عندنا كفايه
السكر اتفقنا مع شركة نمل كبيره عشان يفصلوه من الرمل وقالو
نبي غراف صغير عشان نوزع
الكمية على شركات مسانده
السباك كلمته يجي بكره يسلك البانيو تسكر من الرمل بعد السباحه
الخيمه شفت مالها داعي لان داخل الخيمه وبرى الخيمه زي بعض
رمل
الواحد يخرج يجيب حطب ويدخل معاه كيس رمل وربع ساعه
ماعاد نشوف الفرشه
واذا شبينا النار داخلها ماعاد شفنا بعض من العجاج ونحس بدوخه
واذا فتحنا الباب او الرواق
تحولت النار الى رماد من زين الرياح تذكرت رياح الخماسين
وكأنها مالقت طريق بالارض
الا من داخل خيمتنا واذا خرجنا افترشنا الطين وتقعرنا فيه ونطالع
في السماء متورطين
لان بالبر عندنا مافيه الا الرمل او السماء انسوا سالفة عشب او
خضار او غدير او اشجار
او جبال او هضاب او ارانب او قطو حتى قطو مافيه
وقالوا ايش ؟؟ قالوا خيمنا بالبر 
قولوا الحمد لله على السلامه